Un dos ámbitos prioritarios de intervención do Concello de Ames é poñer en marcha actuacións en materia de prevención, detección e intervención da exclusión social.

Neste senso, o Concello de Ames decide poñer en marcha un programa de inserción laboral que responda ás actuais demandas sociais de dar cobertura á existencia dunha oferta formativa que incremente o índice de inserción laboral e social no municipio, como requisito imprescindible para poder fixar poboación no mesmo, axustándose aos intereses e necesidades do colectivo ao que se dirixe e fomentando a cohesión social, a loita efectiva contra a discriminación e a erradicación da pobreza.

O programa de inserción laboral deriva dun estudo previo onde se determinan os colectivos desfavorecidos prioritarios, así como as súas demandas específicas de formación, acompañamento e práctica laboral, sendo unha das liñas de actuación con maior e máis inmediato efecto na reinserción laboral e que precisa dunha atención diferenciada das actuacións que en materia de políticas activa de emprego xa emprende o Concello.

Así, o obxecto da licitación é a execución e seguimento das accións do programa de inserción laboral para colectivos desfavorecidos do concello de Ames. En concreto, trátase da posta en marcha dos servizos de xestión e apoio técnico do programa de inserción de colectivos desfavorecidos, así como a impartición da formación transversal, ocupacional sectorial e teleformación.

As prestacións que servirán para a posta en marcha e execución do programa, estarán desagregadas nos seguintes lotes:
    • Lote 1. Xestión e apoio técnico do programa de inserción de colectivos desfavorecidos.
    • Lote 2. Impartición da formación transversal do programa de inserción de colectivos desfavorecidos.
    • Lote 3. Impartición da formación ocupacional sectorial do programa de inserción de colectivos desfavorecidos.
    • Lote 4. Servizo de acceso a unha plataforma de teleformación do programa de inserción de colectivos desfavorecidos.

A estratexia proposta co programa de inserción laboral de colectivos desfavorecidos no concello de Ames pon o foco de atención na necesidade de dotar ás persoas, especialmente poboación feminina e inmigrante, mocidade sen cualificación, e parados de longa duración en situación de desemprego, en procura de primeiro emprego ou en procesos de mellora de emprego, das competencias transversais/horizontais e competencias profesionais necesarias para poder consolidarse no mercado laboral, atendendo ás competencias en materia de tecnoloxías da información e comunicación.

Os resultados esperados que se pretenden alcanzar co presente servizo son:
    • Integración social e laboral de persoas desempregadas, con especial atención a inmigrantes, mulleres e poboación moza.
    • Incremento do índice de inserción laboral e social no municipio como requisito imprescindible para poder fixar poboación no mesmo.
    • Fomento da competitividade e inclusión social, así como da igualdade entre homes e mulleres.

Esta actuación está cofinanciada pola Unión Europea a través do Fondo de Desenvolvemento Rexional (FEDER) cunha taxa de cofinanciamento do 80% dentro do Programa Operativo FEDER de Crecemento Sostible 2014/2020, enmarcado dentro da Estratexia de Desenvolvemento Urbano Sostible Impulsa Ames, de conformidade coa Resolución do 21 de xullo de 2017, da Secretaria de Estado de Orzamentos e Gastos, pola que se resolve a concesión definitiva de axudas da segunda convocatoria para a selección de estratexias de desenvolvemento urbano sostible e integrado.

Novas relacionadas:

La Voz de Galicia: "Ames perfila un plan de empleo para 612 personas en sectores de alta demanda en la comarca"

El Correo Gallego: "Ames vincula al futuro centro multifuncional la inserción laboral de cientos de desfavorecidos"