Castiñeiro do Lobo, na parroquia de Ames, sumarase aos lugares onde se realizan melloras nas infraestruturas das zonas rurais aprobadas polo Concello de Ames, contando cunha estrada renovada e acondicionada. A Xunta de Goberno Local aprobou a licitación deste proxecto o pasado xoves 16 de febreiro, cun orzamento de 242.541,55 euros incluídos no plan POS+ 2022.

A actuación inclúe unha limpeza previa ao comezo das obras das marxes da estrada, así como a demolición da cuneta de formigón existente e do pavimento das entradas a vivendas. Tamén se executará o fresado da capa de rodaxe do treito inicial, de 350 metros de lonxitude. Así mesmo, proxéctase a mellora de dita capa de rodaxe, previa reparación de fochancas con grava e tratamento asfáltico semiprofundo.

No segundo treito, de 480 metros de lonxitude, executarase unha cuneta transitable de 1,50 metros de ancho medio por ámbalas marxes, mediante 20 centímetros de zahorra e 15 centímetros de formigón en pavimento con mallazo. A cuneta disporá un bordo na súa parte exterior.

A drenaxe superficial da plataforma para o segundo treito levarase a cabo mediante canalización de PVP baixo a cuneta, arquetas con sumidoiro e arquetas para recolector. No caso do treito inicial, mantéñense os elementos para a recollida de augas pluviais existentes. Para rematar, as actuacións completaranse coa sinalización horizontal e vertical correspondente.

A licitación desta obra acompaña a outras melloras aprobadas recentemente en infraestruturas similares do rural. O alcalde de Ames e concelleiro de Obras e Servizos Básicos, Blas García, puxo en valor “a aposta do Goberno polo rural amesán, xa que estamos realizando investimentos importantes para renovar as vías e infraestruturas do rural e fomentando que os nosos núcleos sexan lugares atractivos para vivir”.