O salón municipal Francisco Laporta de Alcoy (Alacante) acolleu a primeira fin de semana de xullo a XXIV edición do Campionato de España de patinaxe. Na categoría xuvenil de patinaxe artístico libre feminina, con case 40 puntos de vantaxe sobre a segunda clasificada, a galega Nadia Iglesias Salvador proclamouse campioa. No campionato, na mesma categoría que Nadia, participaron outras catro patinadoras galegas: Iria Boullosa, Valeria Mena, Ana Arias e Claudia Tordable.

A patinadora explica que a súa carreira sobre rodas empezou sendo moi nova: con catro anos calzouse os seus primeiros patines e “aos cinco xa empecei a competir”. Admite que este campionato foi o mellor que fixo ata o de agora. “O programa longo saíume case perfecto, os resultados están aí”, explica a patinadora. As dúas coreografías coas que competiu, a de maior duración ou programa longo e a de menor, o programa curto, foron creadas para ela polo coreógrafo arxentino Daniel Arriola.

Durante o curso, ademais de adestrar “tres días á semana na Coruña” empregou a miúdo “o pavillón polideportivo de Bertamiráns”. Alí adestra con Rosa García, do club ao que se mudou fai un ano, o CPA Maxia. Nadia admite que foi Rosa a que lle devolveu “as ganas e a ilusión por competir”. Esta mesma coreografía será a que repetirá en agosto no Campionato Europeo de Patinaxe.

O ano que vén Nadia subirá de categoría e comezará a competir na júnior. Isto, nas súas palabras, supón un novo reto ao permitirlle clasificarse “para un campionato mundial”. “É moi difícil”, confesa, “pero traballarei duro e intentareino”. Explica que para ela compaxinar adestramentos -estas semanas está perfeccionando a súa actuación para o Campionato Europeo- non é moi complicado. Este ano comezará segundo de bacharelato e ten claro que quere que os seus estudos universitarios “estean moi ligados á vida deportiva, quero estudar INEF e Fisioterapia”.