O Premio Calidade, outorgado pola Rede Española de Cidades Saudables, que Ames gaña este ano, súmase a outros recibidos polo Concello nos últimos tempos como o Premio Progreso da Federación Andaluza de Municipios e Provincias polos servizos de conciliación ou o recoñecemento de Ciudad de la Ciencia e Innovación polo proxecto Innov@mes. No pasado mes de outubro de 2020, o Concello presentou o programa “Ames Saudable”, como proposta ao premio, que acada a súa terceira edición.

O fomento dunha alimentación saudable, a promoción da actividade física en todas as idades e a prevención de condutas aditivas con e sen sustancias, son os eixos sobre os que se sustenta o programa “Ames Saudable”. Na proposta ao premio da RECS, púxose de manifesto o feito de que o programa, dependente da Concellaría de Promoción da Saúde, lévase a cabo dun xeito transversal e buscando acadar a equidade no acceso a saúde. Tamén se destacou “o papel enriquecedor e diferenciador que desempeña a nutricionista municipal ligada á Concellería de Promoción da Saúde”.

O alcalde de ames, José Miñones destacou a importancia que este recoñecemento ten para o concello de Ames quedando por diante de cidades tan potentes como Murcia ou Palma de Mallorca, que foron premiadas tamén cun accésit. “É un gran recoñecemento para o Concello de Ames recibir premios por servizos que estamos a prestar. Esta distinción dá continuidade ao Premio Progreso, da Federación Andaluza de Municipios e Provincias, polo proxecto Concili@mes. Este é un recoñecemento ao un proxecto que aposta por un estilo de vida saudable para veciñanza de Ames. “Ames Saudable” engloba moitas áreas e servizos municipais, que están desenvolvéndose actualmente e que tamén xa veñen de atrás. Este é un premio no que se recoñece unha boa práctica, para que a teñan en conta outros concellos. É algo que xa sucedeu co premio Progreso, que fixo que outros concellos de España se interesasen polo modelo de comedores e servizos de conciliación de Ames. A realidade é que arredor de “Ames Saudable” hai moitos servizos postos en marcha, algúns máis coñecidos como o de fomento da actividade deportiva ou de envellecemento activo, pero moitos outros máis descoñecidos pero igualmente importantes como poden ser o Banco municipal de alimentos ou a campaña Que ninguén quede atrás, por poñer dous exemplos nada máis”.

Pola súa banda, a concelleira de Promoción da Saúde, Luísa Feijóo falou de todo o traballo que se agocha detrás de “Ames Saudable” e dos beneficios que está a provocar na cidadanía amesá: “este programa comeza cunha reformulación da Concellería de Sanidade dotándoa de contido e vinculando a técnica en nutrición a este servizo. Con este cambio conseguimos darlle un papel específico na promoción da saúde, en prevención, tratamento e a rehabilitación de enfermidades, a través tanto dunha alimentación saudable como da realización de actividade física e a prevención de consumos, o cal sen dúbida redunda nun beneficio na saúde física e emocional individual e colectiva da nosa poboación. Desta forma, dáse paso á figura actual con funcións vinculadas á saúde pública (prevención e promoción da saúde), actuando sobre a poboación en xeral, e coordinando dun xeito totalmente transversal as diferentes accións, e sobre todo garantindo que toda poboación, e en especial aquela que conta con menos recursos, poidan acceder a esta atención. Dende o departamento de Promoción da Saúde traballamos sempre dende a perspectiva de alcanzar a equidade en saúde”.

A nutricionista municipal, Rosana Martínez, explicou que para presentar este proxecto ao Premio Calidade, que outorga a RECS, partimos de programas que levan desenvolvéndose moitos anos en Ames, como poden ser as escolas deportivas e programas de fomento da actividade física entre as persoas maiores. Tamén se recolle o proxecto de alimentación saudable que se realiza a través da Rede de comedores escolares. Pero ademais foron organizándose novas actividade relacionadas coa promoción da saúde en función da demanda que fai a veciñanza na actualidade. Todo isto recolleuse na proposta presentada a este premio, de aí o nome do proxecto Ames Saudable, gaña saúde con cada paso”.

Rosana Martínez destaca tamén que “nos últimos anos puxéronse en marcha novas actividades relacionadas coa prevención e promoción da saúde. Deste xeito, puxéronse en marcha as rutas e andainas saudables, que permiten realizar actividade física e tamén socializar con outras persoas. Tamén se puxeron en marcha os faladoiros saudables nos que se abordan cuestións relacionadas coa alimentación, enfermidades como a hipertensión, etc. O obxectivo é promocionar a saúde entre a veciñanza e que cada veciño/a lle dedique un anaco do día a camiñar e a coidarse, porque iso é a saúde física e emocional. Este programa é moi transversal porque implica a moitos outros departamento como poden ser deportes, mobilidade, voluntariado, igualdade, educación, transición ecolóxica, etc. A Concellaría de Sanidade apenas ten competencias a nivel local, pero hai moitos xeitos de promocionar a saúde, e iso é o que estamos facendo dende este departamento, implicar á veciñanza para que se coide tendo presentes tres piares básicos como son a alimentación saudable, a realización de actividade física, e maila prevención de condutas aditivas”.

Premio de Calidade da Rede Española de Cidades Saudables
Co obxectivo de recompilar e difundir as actuacións que están desenvolvendo os Gobernos Locais no ámbito da saúde local, a Rede Española de Cidades Saudables convocou a terceira edición deste certame. A RECS, que leva organizando proxectos dende o ano 1988, pretende favorecer o intercambio e a difusión de experiencias locais que contribúan a mellorar a saúde e o benestar da cidadanía.

Para facilitar a oportunidade de presentar diferentes proxectos, a Rede Española de Cidades Saudables estableceu categorías diferentes: ao “Fomento dun Desenvolvemento Urbano Saudable e Sostible”, ao “Desenvolvemento da Acción Comunitaria como medida de protección social y de promoción da saúde” e un último premio na categoría especial “Covid-19”.

O Concello de Ames, que participou co programa “Ames Saudable”, gañou na categoría de calidade ao “Fomento de iniciativas que favorecen Estilos de Vida Saudables”. Nesta sección tamén foi premiado o concello de Santa Úrsula, en Tenerife.

Programa Ames Saudable
Consellos de alimentación, atención ao público e deseño de menús para os comedores escolares, as escolas infantís e os programas de conciliación, andainas programadas nas que colaboran os Centros de saúde, charlas e obradoiros sobre nutrición, prevención de condutas aditivas, coidados do corpo e da mente, programas de envellecemento activo, clases de ioga, de pilates, de danza, de memoria, de música, de ximnasia terapéutica... O proxecto “Ames Saudable”, dependente da Concellería de Promoción da Saúde, aglutina toda unha serie de propostas dirixidas a todas as idades e encamiñadas a dotar de información e recursos á cidadanía, e ten como fin último lograr un concello cada vez máis saudable e un maior benestar dos veciños e veciñas, fomentando a participación e estilos de vida saudables

Un dos últimos proxectos de “Ames Saudable” foron o salto ás redes sociais durante o primeiro confinamento para poder dar continuidade ao que se viña facendo de xeito presencial e poder seguir ofrecendo recursos á veciñanza para que continuase coidando corpo e mente. Tamén recentemente púxose en marcha a Escola Municipal de Saúde, que arrancou cos obradoiros “Mulleres que se coidan, coida de ti”. Trátase dunha actividade anual composta por diferentes actividades, como ioga terapéutico, clases para coidar a saúde física e emocional, faladoiros sobre autocoidados, sensibilización, empoderamento, etc. O programa púxose en marcha no mes de outubro de 2020.

Novas relacionadas:

El Correo Gallego: "Premio por los estilos de vida saludables para Ames"