[06-01-2011] As veciñas e os veciños de Ames pensionistas poderán acollerse, un ano máis, ao Programa de Termalismo Social que o IMSERSO oferta a través do Concello de Ames. As persoas participantes poderán gozar de 12 días e 11 noites nun balneario de Galicia en réxime de pensión completa e con seguimento médico e tratamento termal. Para obter máis información e tramitar as solicitudes haberá que acudir ás oficinas de Servizos Sociais municipais, situadas no centro sociocultural de Bertamiráns e nas novas oficinas do Milladoiro.
O Programa de Termalismo Social ofrece un ano máis ás persoas pensionistas de Ames unha estancia entre a saúde e o ocio en balnearios de Galicia en réxime de pensión completa. O programa inclúe seguimento médico e tratamento termal ao longo de 12 días e 11 noites. Esta iniciativa diríxese a persoas pensionistas da Seguridade Social polos conceptos de xubilación e invalidez en todo caso, e os de viuvez e doutras pensións cando a persoa beneficiaria teña cumprido os 60 anos de idade. O prezo oscila segundo o balneario escollido entre os 254,61 e os 447,19 euros.
As persoas interesadas na iniciativa poden presentar as súas solicitudes para dous períodos. Para a quenda que vai de febreiro ata o mes de agosto, ambos incluídos, os solicitantes con prioridade na adxudicación de prazas terán ata o día 11 de xaneiro para dirixir a súa solicitude ás oficinas de Servizos Sociais do Concello, e ata o día 17 do mesmo mes no caso de que se remitan a súa solicitude directamente ás dependencias de Termalismo Social en Madrid. As persoas que deban ser incluídas en listas de espera terán de prazo ata o 16 de maio tanto nas oficinas de Servizo Sociais de Ames como nas dependencias de Madrid.
O segundo período, o que inclúe entre setembro e decembro, ten de prazo ata o 10 de maio nas oficinas de Servizo Sociais, e ata o 16 nas delegacións provinciais de Vicepresidencia da Igualdade e do Benestar para as persoas con prioridade na adxudicación de prazas. Para as listas de espera, o prazo rematará o 24 de outubro nas oficinas de Servizos Sociais e o 28 en Vicepresidencia. A información e tramitación de solicitudes facilitaranse nas oficinas de Servizos Sociais do Concello do centro sociocultural de Bertamiráns e nas oficinas do Milladoiro, previa cita nos 981 89 09 64 e 981 53 59 41 respectivamente.
Os balnearios incluídos no programa repártense por toda Galicia. Así os participantes poderán gozar do de Santiago de Compostela en Brión, Baños Viejos en Carballo, o de Arteixo, o de Guitiriz, as Termas Romanas de Lugo, o do Río Pambre en Palas de Rei, o do Arnoia, o de Baños de Molgas, o de Laias, o do Carballiño, o de Lobios, os de Acuña e de Dávila en Caldas de Reis, o de Caldelas de Tui, as Termas de Cuntis, os Baños de Brea en Vila de Cruces e o Hesperia da Illa da Toxa.