[22-09-2014] Un total de 1.094 nenos e nenas de Ames serán usuarios/as da rede municipal de comedores durante o vindeiro curso, segundo os datos provisionais que manexa a Concellería de Educación do Concello de Ames, unha vez pechado o prazo para que os usuarios/as dos servizos complementarios puidesen matricularse ou renovar praza para o curso 2013-2014. Aínda así, hai varios alumnos que están nunha lista de agarda e dispoñen de praza xa que para este curso a Rede Municipal de Comedores Escolares oferta 1.165 prazas. Ademais, ofértanse 550 prazas para os programa de Bos días Cole e Tardes divertidas.
Os servizos complementarios do Concello de Ames teñen como principal obxectivo conciliar a vida familiar e laboral de todos os veciños e veciñas de Ames. O servizo da Rede Municipal de Comedores Escolares, un programa xestionado directamente polo Concello, está dirixido ao alumnado de infantil e primaria, funcionando actualmente no CEIP Agro do Muíño, no CEIP A Maía, no CEIP de Barouta, no CEP de Ventín e na Escola de Educación Infantil do Milladoiro.
Con este programa realízase por unha parte un servizo público, facilitando aos cidadáns a conciliación da vida laboral e familiar e por outra, un proxecto educativo no que o obxectivo é que o alumnado aprenda hábitos alimentario sans e un correcto comportamento na mesa, así como as normas básicas de hixiene, respecto, tolerancia, convivencia e educación en igualdade.
Ofértanse un total de 1.165 prazas
Para o curso 2014-2015 a Rede Municipal de Comedores Escolares oferta un total de 1.165 prazas (245 para o CEIP Agro do Muíño; 330 para o CEIP A Maía; 80 para o CEIP de Barouta; 285 para o CEP de Ventín; 225 para a Escola de Educación Infantil do Milladoiro). A estas prazas habería que sumarlle 75 máis, correspondentes a 10 prazas por comedor para usuarios/as ocasionais, e 5 prazas por comedor para usuarios/as trasladados de outros concellos.
Para atender este servizo o Concello de Ames dispón dunha técnica en nutrición e dietética que é a encargada da elaboración dos menús que se serven nos comedores municipais. A elaboración dos menús faise semanalmente de xeito que non se repiten e á vez empréganse ao máximo os produtos de tempada. Ademais, esta técnica encárgase de atender os casos de tratamentos alimentarios especiais.
Bos días Cole e Tardes divertidas
Por outra banda, dentro dos servizos complementarios o Concello de Ames tamén oferta os servizos de Bos días Cole e Tardes divertidas. Estes servizos desenvólvense en cinco centros educativos como son o CEIP Agro do Muíño, o CEIP A Maía, no CEIP de Barouta, no CEP de Ventín e na EEI Milladoiro. Ambos os dous programas están dirixidos ao alumnado de segundo ciclo de Educación Infantil e Primaria.
Para o curso 2014-2015 ofértanse 330 prazas para o Bos días Cole (90 para o CEIP Agro do Muíño; 85 para o CEIP A Maía; 30 para o CEIP de Barouta; 55 para o CEP de Ventín; e 70 para a Escola de Educación Infantil do Milladoiro) e 220 prazas para as Tardes divertidas (30 para o CEIP Agro do Muíño; 45 para o CEIP A Maía; 25 para o CEIP de Barouta; 60 para o CEP de Ventín; e 60 para a Escola de Educación Infantil do Milladoiro).
