[13-05-2015] A Casa da Cultura do Milladoiro acolleu hoxe a celebración do Día das Letras Galegas. O acto comezou cun concerto do alumnado da Escola Municipal de Música de Ames e de seguido realizouse a entrega de premios do VII Certame artístico-literario “Intercentros”, dirixido ao alumnado amesá e do XII Certame Literario de Narrativa e Poesía.
O alcalde de Ames, Santiago Amor, felicitou aos participantes e destacou que “o Concello estimula a creación artística entre a mocidade”. Amor manifestou que “tanto a cultura como a lingua e o territorio é parte esencial da identidade dun pobo” e convidou a compartir “o amor pola nosa lingua”.
O xurado do XII Certame Literario de Narrativa e Poesía Concello de Ames, que estivo composto polos escritores Mariña Pérez Rei e Alfredo Conde Cid e a crítica literaria Mar Fernández Vázquez, coincidiu en destacar a “alta calidade” dos traballos. Este concurso, toda unha referencia dentro do mundo da poesía e a narrativa, que permite dar a coñecer as novas voces da literatura galega, reuniu un total de 105 traballos procedentes de toda Galicia, e mesmo de Valencia, Valladolid, Ponferrada, Albacete ou Lleida. Na modalidade de poesía houbo 46 traballos mentres que en narrativa presentáronse 59.
De todos os participantes foron catro os veciños amesáns galardoados este ano. Así Manuel Otero Boquete fíxose co primeiro premio no apartado de poesía para adultos polo texto Paradigma (de xénese xenérica) e Daniel Vilaverde Framil acadou o terceiro posto nesta mesma categoría pola obra Replicante. Por outro lado, Salvador Pena Castro levou o segundo premio de narrativa para rapaces de entre 14 e 17 anos e Xosé Anxo Corral Suárez gañou na categoría para adultos no apartado de narrativa coa obra O desvarío do almirante.
Premios do VII Certame artístico-literario “Intercentros”
O primeiro premio, na categoría de 3º e 4º de primaria, foi para o texto O soño de Breixo: unha lingua viva, de Sara Morán Alonso (4º do CEIP Agro do Muíño); seguido de A lingua, o noso tesouro, de Natalia Paz Peláez (4º do CEIP A Maía) e Sofía e Raúl, de Julia del Río Bravo (3º do CEIP Agro do Muíño).
Na segunda categoría competiron escolares de 5º e 6º de primaria e as obras gañadoras foron Que facer coas palabras, de Iria Pérez Álvarez (6º do CEIP A Maía); Malena e a bruxa, de Eva Montoto Pintos e Candela Martínez Fuentes (5º do CEIP Agro do Muíño) e en terceiro lugar As palabras viaxeiras, de Raúl Jiménez Cunqueiro (6º do CEIP A Maía).
