Os concellos de Ames e Brión atópanse en situación de pre-alerta decretada a semana pasada pola demarcación hidrográfica Galicia-Costa. Debido a iso decidiuse publicar unha campaña conxunta que se denomina “Augaconsellos,, para achegarlle á veciñanza consellos de cara a fomentar o aforro de auga.

A través da campaña “Augaconsellos”, achéganse 12 recomendacións e medidas para animar á veciñanza a facer un uso responsable da auga de xeito sinxelo nun período estival especialmente caloroso e seco. A través desta campaña, inclúense varias medidas que pode adoptar a veciñanza de xeito sinxelo para reducir o consumo de auga:

1. Dúchate en lugar de bañarte e pecha a billa mentres te enxaboas.
2. Pecha a billa mentres te enxaboas as mans, lavas os dentes ou te afeitas.
3. Enche un caldeiro mentres esperas a que a auga da ducha saía quente e utilízaa logo para fregar o chan.
4. Coloca unha papeleira no baño para evitar usar o inodoro como caldeiro de lixo.
5. Emprega a cisternas de dobre descarga no inodoro para utilizar soamente a auga necesaria.
6. Instala economizadores de auga nas billas, duchas e inodoros.
7. Utiliza a lavadora coa carga completa e o programa adecuado.
8. Usa o lavalouza sempre que poidas e coa carga completa. Cando fregues os pratos á man, nunca o fagas deixando correr a auga.
9. Repara as billas se detectas fugas na túa instalación.
10. Rega as túas plantas á primeira hora da mañá ou á tardiña.
11. Non baleires a túa piscina cando termine o verán, a auga do vaso pode aguantar ata cinco anos sen cambiar.
12. Pecha levemente a chave de paso da vivenda. Non apreciarás a diferencia e aforrarás unha gran cantidade de auga.

Segundo explica o alcalde de Ames, Blas García, “a través desta campaña achéganse concellos para fomentar o aforro de auga entre a veciñanza. Esta campaña publicarase nas redes sociais dos dous Concellos e tamén se repartirán folletos informativos entre a cidadanía para tratar de facer un uso responsable da auga”.

O alcalde de Brión, Pablo Lago Sanmartín, destacou “facemos un chamamento aos veciños e veciñas de Brión e de Ames para o uso responsable e adecuado da auga. Aínda que está sendo un ano atípico é moi probable que no futuro os veráns sexan deste tipo. Por eso é necesario que desde as administracións creemos as infraestruturas necesarias para garantir o subministro da auga á veciñanza”.

Novas relacionadas:

La Voz de Galicia: "Ames y Brión lanzan doce consejos para ahorrar agua"

AMSGO!: "Os Concellos de Ames e Brión colaboran nunha campaña de fomento do aforro de auga"