Seguindo a liña de traballo iniciada polo goberno municipal cos diferentes organismos asociativos do concello, o alcalde de Ames, Santiago Amor, mantivo varias xuntanzas coa asociación de taxistas de Ames. Deste xeito, no pasado mes de marzo a nova directiva desta asociación, que está formada por Agustín Núñez, que ocupa o cargo de presidente, Andrés Núñez, vicepresidente, Gustavo Castro, secretario, e Santiago Núñez, tesoureiro, presentoulle ao goberno municipal un estudo das tarifas a aplicar durante este ano polo servizo de taxis de Ames. Un dos temas máis importantes que se abordaron nesa xuntanza celebrada no mes de marzo foi o dos taxímetros, así como as tarifas a aplicar.

A partir dese momento o Concello de Ames, a través da concellaría de Promoción Económica, comezou a traballar na elaboración dunha ordenanza que regulará o servizo de taxis amiense, adaptada ao que establece a Lei 4/2013, do 30 de maio, de transporte público de persoas en vehículos de turismo de Galicia, aprobada en 2013 polo Parlamento de Galicia. Na nova ordenanza regúlanse as tarifas para o ano 2014 e a colocación de taxímetros en todos os vehículos que ofrezan este servizo, así como outras particularidades do servizo.

A proposta desta ordenanza transmitíuselle e foi posta en común coa asociación de taxistas de Ames. Ademais, dentro do proceso de tramitación da devandita ordenanza, déuselle trámite de audiencia enviándolle unha proposta á Dirección Xeral de Mobilidade, ás tres organizacións sindicais máis representativas dentro do sector do taxi de Ames e á Unión de Consumidores de Galicia (UCGAL). Actualmente, esta ordenanza está en fase de audiencia antes da súa tramitación polo Pleno do Concello.

Contido relacionado

La Voz de Galicia: "Los quince taxistas de Ames quieren equiparar las tarifas del servicio a las de Santiago"
El Correo Gallego: "Ames contará cunha ordenanza que regulará a utilización dos taxímetros"