O concello de Ames segue a sumar habitantes un ano máis e xa se consolida como un municipio con máis de 30.000 veciños/as. Segundo os datos que manexa o departamento do padrón municipal a comezos de 2017 hai censados en Ames 31.173 habitantes, dos que unha gran maioría deles están en idade de traballar e outra ampla maioría encádrase no grupo dos mozos, garantindo así o futuro demográfico do concello. Así, na franxa de 0 a 15 anos hai actualmente 5.950 persoas censadas; de 16 a 30 anos son 4.476 os habitantes censados; de 31 a 60 anos hai 16.180; e de máis de 60 anos están rexistradas 4.567 persoas.

Deste xeito, o municipio amesán segue a ser un dos concellos que máis medra en toda Galicia, cunha porcentaxe de poboación nova moi alta, o que sitúa a idade media da poboación amesá arredor dos 38 anos aproximadamente. Ademais, Ames é un dos concellos galegos cun mellor saldo vexetativo. Durante o 2016 houbo 351 nacementos e 150 defuncións, polo que se rexistrou case un nacemento por día.

O alcalde de Ames, José Miñones, indica que “o dato de nacementos segue a aumentar de forma progresiva nestes últimos anos superando os 344 de 2015, os 346 de 2014, e os 317 do 2013. Para o Concello estes números tan positivos son o resultado das políticas de conciliación que queremos potenciar e o feito de que en Ames se conte cuns servizos de calidade”.

En Bertamirás e no Milladoiro residen 21.368 habitantes, que representa o 68% da poboación. Por localidades, Milladoiro segue á cabeza do concello cun total de 12.769 habitantes censados (41% da poboación). Mentres que en Bertamiráns están censados 8.599 persoas (27% da poboación). Os 9.805 habitantes (32% da poboación) restantes distribúense entre as urbanizacións e as zonas rurais do concello. Esta poboación repartese do seguinte xeito: en Agrón residen 391 persoas; na Ameixenda 334; na parroquia de Ames 1.559; en Biduído 1.663; en Bugallido 1.523; en Covas 971; en Lens 94; en Ortoño 2.551; en Pilñeiro 239; Tapia 122; e en Trasmonte 358.

Con todos os datos derriba da mesa, podemos dicir que Ames destaca pola paridade en canto a sexos. Se falamos de demografía, tan só existen tres puntos e medio de diferenza entre os homes e as mulleres. Hai 14.999 homes, que representa o 48,12% da poboación, mentres que elas son 16.174 e representan o 51,88%.

O rexedor municipal explica que “debido ás características da poboación de Ames, que é eminentemente xoven, temos que seguir apostando polos servizos municipais que se están ofrecrndo e incluso reforzar os programa de conciliación da vida familiar e laboral, como así estamos facendo coa posta en marcha do Entroido Lúdico e coa posta en marcha de programas de promoción de hábitos saudables e deportivos como é o caso do programa Ames saudable”.

Crecemento dende o ano 2.000
Nas últimas décadas, Ames foi un dos concellos galegos que máis medrou. Segundo os datos que figuran no Instituto Nacional de Estadística (INE) no ano 2000 o concello de Ames dispoñía de 16.549 habitantes (8.048 homes e 8.501 mulleres). En 2003 o número de habitantes xa ascendía a 20.016 persoas (9.718 homes e 10.298 mulleres), polo que o incremento en tres anos foi de 3.467 habitantes, máis de mil persoas por ano. Se nos detemos no ano 2006 o censo xa acumulaba un total de 23.219 habitantes (11.268 homes e 11.951 mulleres), polo que se volve a incrementar a cifra de censados en 3.203 persoas.

En 2009 o censo ascendeu ata chegar aos 26.983 habitantes (13.079 homes e 13.904 mulleres), polo que se volveu a producir un novo incremento de 3.764 habitantes respecto ao ano 2006. A principios de 2012 Ames xa contaba cun total de 29.331 habitantes, polo que en tres anos volveu a incrementarse en 2.348 o número de habitantes. Tres anos despois, a principios de 2015, o INE contabiliza un total de 30.267 habitantes (14.608 homes e 15.659 mulleres).

Contido relacionado

El Correo Gallego: "Ames crece imparable y estrena el año con más de 31.100 habitantes"
La Voz de Galicia: "Ames, Teo y Oroso, únicos concellos en los que nace más gente de la que fallece"