A quinta edición da campaña Superlectores chegou ao seu fin coa entrega de premios. Esta iniciativa comezou no pasado mes de abril con motivo do Día do Libro e rematou coa conmemoración do Día das Bibliotecas, celebrado o pasado 24 de outubro. Con esta campaña, as bibliotecas municipais buscan poñer en valor ao seu público máis fiel, ao tempo que presentan o seu fondo ás persoas que aínda que non o coñecen.

Superlectores está dirixido tanto ao público infantil como aos adultos. Polo tanto, existen dúas categorías (unha para persoas menores de 14 anos e outra para maiores de 14 anos). Cada usuario e usuaria pode conseguir unha tarxeta de Superlector ou Superlectora (de cor branca para a categoría infantil e de cor laranxa para a categoría de adultos), solicitándoa nas instalacións das bibliotecas municipais.

Os/as usuarios/as van recibindo un selo por cada préstamo que soliciten nas bibliotecas amesás. Unha vez cheas, as tarxetas recolléronse para así facer o sorteo de lote de libros, que se realizou o pasado 15 de outubro. Agora, este luns 26 de outubro, o alcalde e responsable do departamento de Bibliotecas municipais, Blas García, fixo entrega dos premios.

Repartíronse máis de 160 tarxetas de Superlectores
Os/as usuarios/as da bibliotecas municipais de Bertamiráns e do Milladoiro recolleron máis de 160 tarxetas de Superlectores nas que tiveron que ir acumulando selos para participar no sorteo. En total, entregáronse 14 premios (8 infantís e 6 para persoas adultas), que consistiron en lotes de libros e mochilas con diverso material (bloc de notas, bolígrafo, usb e un xogo).

As persoas premiadas na biblioteca municipal de Bertamiráns foron Anxo Prado, Amador Vázquez, Anxo Expósito e Daniel Soliño, na categoría infantil de menos de 14 anos; e  Manuela Pajares, María Encarnación Ruíz e Irene López, na categoría de máis de 14 anos. Na biblioteca municipal do Milladoiro os/as premiados/as na categoría infantil foron Alberto Barros, Emma Santalla, Izan Andina e Nekane Franco; mentres que na categoría de adultos as persoas premiadas foron Ramón Cobas, Inmaculada Concepción Carreño e Noelia María Martín.