Empresas participantes no "Roteiro Maker"
En dita mostra participarán 12 empresas: 7 varas, que ofrecerán bicicletas ecolóxicas de bambú feitas a man; Alicornio, empresa que ofrece servizos audiovisuais e procesado de datos técnicos en diversos formatos mediante o uso de plataformas voantes non tripuladas (drones); Arcade Pi, que porá na mostra máquinas de videoxogos feitas con Raspberry Pi, Escornabot, proxecto educativo que busca iniciar aos cativos no campo da robótica e a programación mediante a creación manual dun robot, e Factoría de Androides, que mostrará as súas esculturas de robots con aire retro e feitos con materiais de refugallo.

Por outra banda, a empresa Irmáns Vidal, dará a coñecer o traballo que realiza para a creación de esculturas interactivas con efecto 3D manual. Tamén participan as empresas Makergal, compañía de deseño e distribución de impresoras 3D feitas en Galicia; Mateo Mena, inventor de The hypercubes: sintetizadores analóxicos para facer música e electrónica de maneira manual e sen cables; Nacho Porto, que se centra na innovación tecnolóxica aplicada á cerámica: esculturas con usb, altavoces de cerámica para smartphones, etc; a Sociedade Xuvenil Galega de Química, que é un espazo de traballo de divulgación e valorización da investigación galega no eido da Química, da mocidade para a sociedade, e UvigoMotorsport, primeiro equipo de Formula Student de Galicia e que ten como obxectivo deseñar un monopraza apto para competir na presente temporada.

Asemade, a Casa escuela obradoiro Ana Rosa, que está situada nas Punxeiras Altas, pertencente á parroquia de Ortoño, presentará novos patróns e innovadores puntos que está aplicando a un arte tan tradicional e antigo como o do encaixe e bordado.

Acto de acendido do alumeado de Nadal
Ás 20:00 horas, desenvolverase o acto de acendido das luces de Nadal, unha decoración que o Concello manterá ata o día 6 de xaneiro. Este ano o alumeado contará con máis de 100 arcos e máis de 30 postes, que estarán colocados en farois e diferentes tipo de adornos en árbores e prazas. Neste evento participará o coro Son Elas, que lle porá un toque musical a este acto municipal co se dá por iniciado o período de Nadal no concello de Ames. Por último, ás 21:00 horas clausurarase o "Roteiro Maker".

O Concello de Ames organizou un "Roteiro Maker" para este venres 2 de decembro no Milladoiro. A xornada da mañá, de 10:00 a 14:00 horas, está orientada ás empresas, mentres que pola tarde está dirixido aos nenos/as e ao público en xeral. Ás 10:00h realizarase a apertura desta mostra. Unha hora máis tarde, ás 11:00 horas, impartirase a charla Reinventarse coas tecnoloxías do cambio, a cargo de Julio César González, presidente e investigador do Centro Científico Tecnolóxico de Investigación Aplicada Teaxul. As 12:00h haberá outra charla. Neste caso Eldara Rodríguez Cobo, responsable de innovación da empresa NanoGap do Milladoiro falará da Nanotecnoloxia na Industria. Unha vez rematadas estas charlas, de 13:00 a 14:00 horas, haberá tempo para desenvolver un networking.

Pola tarde, ás 16:30h realizarase un obradoiro de química, que está dirixido aos rapaces e rapazas de 10 anos en diante, e ás 18:30 horas, haberá outro obradoiro de electrónica, neste caso para nenos e nenas que teñan a partir de 6 anos. Estes obradoiros, que son de balde, serán impartidos pola empresa VermisLab. Previamente, este mércores 30 de novembro dous técnicos de VermisLab impartiron unhas charlas nos IES do Milladoiro e de Bertamiráns sobre a cultura maker e as novas tecnoloxías. O persoal desta empresa, Enrique Saavedra e Javier Vila, ex-alumno do IES de Bertamiráns, animaron aos preto de 200 rapaces e rapazas, que participaron nestas charlas, a acudir a esta interesante mostra.

Contido relacionado

La Voz de Galicia: "Ames elige Milladoiro para el acto oficial de la campaña navideña"