A Dagan Cup é a única competición de supercross que se organiza en Galicia actualmente. Trátase dun evento non oficial, interprovincial e non federado, de acordo coa actual normativa galega de deportes, e na que se dan cita os mellores pilotos galegos desta modalidade deportiva xa que actualmente non existe outra proba federada de supercross.

Este domingo, 24 de setembro, a partir das 16:00 horas, Ames acollerá a cuarta proba da Dagan Cup 2017. Esta proba desenvolverase no circuíto SX “Alex de Moure”, ao cal se lle realizaron unhas pequenas modificacións no trazado respecto á edición anterior. Este recinto de máis de 17.000 metros cadrados conta cun amplo aparcadoiro, situado a escasos metros da pista de competición, e cunhas condicións óptimas tanto para a práctica do deporte como para contemplación desta modalidade deportiva.

Agárdase unha alta participación nesta proba que pode rondar os 70 participantes, xa que é a penúltima proba deste campionato. A quinta e última proba celebrarase na Coruña. O prazo de inscrición estará aberto ata ás 22:00 horas do venres 22 de setembro. Os participantes, que se inscribiron nesta proba de supercross, estarán divididos en oito categorías diferentes: elite, veteranos, promoción, 85 cc, alevín de máis de 6 anos, alevín de máis de 8 anos, féminas e hobby que son os que se inician neste deporte.

Pola mañá, entre as 9:00 e as 11:00 horas, desenvolveranse as verificacións técnicas e administrativas. De seguido, a partir das 11:15 horas, os pilotos participarán nos adestramentos libres e de clasificación. Este é o momento no que os deportistas toman contacto coa pista na que van ter que competir e mostrar as súas habilidades. Ás 16:00 horas dará comezo a proba que se compón de dúas mangas por categoría. Ao remate da proba realizarase a entrega de trofeos.