Entre o 16 e o 19 de novembro as nenas e nenos de Ames e do resto de Galicia teñen unha cita co mellor do cinema infantil producido no mundo no último ano. Isto é grazas á celebración de Cinema Miúdo, o festival do sétimo arte especialmente dirixido á cativada, no que a proxección de curtametraxes combínase con obradoiros creativos, actividades para escolas, sesións especiais e actuacións de música, circo e maxia. Catro días de programación pensada para brindar ás nenas e nenos a oportunidade de desfrutar de filmes inéditos, orixinais, sorprendentes e de descubrir olladas doutras partes do mundo a través do cinema. O seu obxectivo desde 2017 é formar un público futuro con sensibilidade artística, interese cultural e espírito crítico ante o consumo audiovisual.

O alcalde e concelleiro de Cultura, Blas García, destaca que “se trata dun festival xa asentado na programación municipal que vai medrando tal e como demostra o feito de que en 2022 incrementou o público nun 50 % respecto ao ano 2021. Ademais, Cinema Miúdo comeza a ter un nome na península ata o punto de que Cinanima, o festival de animación máis importante de Portugal, ten este ano unha sesión de Cinema Miúdo. O festival Cinema Miúdo está adherido ao Pacto Cultura Sustentable que difunde, defende e avoga pola redución e control de consumos nos eventos culturais, así como políticas de igualdade e sustentabilidade”.

Selección oficial, o mellor do cinema infantil internacional
A selección oficial está dividida en dous bloques por idades: axóuxeres, para nenas e nenos de entre 2 e 7 anos; e buxainas, para maiores de 7. Está formada por curtametraxes internacionais inéditas e complicadas de atopar nas plataformas que espertan nas xeracións máis novas empatía e a vontade de descubrimento cara outras culturas. Nesta sexta edición crece o número de curtametraxes seleccionadas, de 35 en 2022 a máis de 60. Os bloques Axóuxeres e Buxainas serán proxectados o venres pola tarde, sábado todo o día e domingo pola mañá.

Nesta sexta edición a programación xirará arredor das familias, facendo fincapé na súa diversidade e amosando familias de todo tipo e de varias partes do mundo. As curtas da selección oficial compiten por alzarse cos premios do xurado e o público e serán as nenas e nenos ás que, cos seus votos ao finalizar cada sesión, decidan os filmes gañadores. Cinema Miúdo repartirá máis de 1.400 euros en premios.

A hora dos avós
Ademais dos bloques a concurso, Cinema Miúdo conta con sete actividades paralelas que enriquecen e completan a experiencia de acudir ao primeiro festival para moitas nenas e nenos galegos. Por unha parte, contarase cunha sesión especial fóra de concurso pensada para ser compartida entre avoas e avós e as súas netas e netos con traballos que xiran arredor da familia.

El Meu Primer Festival, certame convidado
Como xa ocorreu na anterior edición Cinema Miúdo, o domingo pola tarde proxectarase a Colleita de cinema galego, unha sesión destinada a amosar traballos feitos en Galicia. Outras das sesións de proxeccións especiais será a elaborada por El Meu Primer Festival, na que o certame catalán, o máis reputado de España, confeccionou unha sesión cos mellores traballos da súa última edición para o público de Cinema Miúdo.

O peliculón: ‘Oink, oink!’
A longametraxe de animación dos Países Baixos é o “peliculón” escollido para esta sexta edición. Unha cinta que combina amor polos animais e a familia con chistes escatolóxicos, elaborada mediante a técnica stop motion. A protagonista da historia é unha nena de 9 anos que recibe como agasallo do seu avó un pequeno porco chamado Oink e convence aos seus pais de quedar con el coa condición de adestralo. O porquiño cambiará a súa vida e a de todos na súa familia ata que as cousas empezan a complicarse de maneira inesperada.

Obradoiro Make a Remake
Unha das actividades máis demandadas desde o nacemento do certame son os obradoiros prácticos, que permiten á rapazada vivir a maxia do cinema como creadores. Este ano celébrase o taller Make a Remake, de creación de escenografías dentro dunha caixa de cartón, dando lugar a un diorama.

O obradoiro está recomendado para nenas e nenos de entre 7 e 12 anos. Constará de dúas quendas con 15 prazas cada unha: sábado, 18 de novembro, de 11.00 a 12:30h na Casa da Cultura de Bertamiráns, e domingo, 19 de novembro, de 11.00 a 12:30h na Casa da Cultura do Milladoiro. A actividade é gratuíta, pero require de inscrición previa enviando un correo electrónico ao enderezo actividades@cinemamiudo.gal indicando nome, idade e teléfono. Na actualidade quedan 5 prazas libres, polo que as familias que estean interesadas deben darse présa en inscribir aos seus fillos/as.

A proposta, ideada por Iria e Ángel de Estudio ia! consiste en crear escenografías en multiplano, tomando como referencia os traballos do cineasta Lotte Reiniger. Para construílas, as persoas participantes partirán dun amplo surtido de referencias e personaxes de filmes coñecidos. A través do xogo, a composición e a recontextualización crearán un novo universo, materializando dioramas dentro dunha caixa de cartón. Un xeito lúdico de achegar ás nenas e nenos á arte da composición e a escenografía a través dunha actividade divertida e creativa.

Cinema Miúdo
Cinema Miúdo é un festival de cine infantil, que nace no concello de Ames en 2017. O festival quere proporcionar ao público miúdo a oportunidade de desfrutar de filmes inéditos, orixinais, sorprendentes e de descubrir olladas doutras partes do mundo. Deste xeito propíciase que a rapazada descubra o gusto polo cinema e fórmase un público futuro con sensibilidade artística, interese cultural e espírito crítico ante o consumo audiovisual. Algo de especial relevancia para o Concello de Ames, que ten a maior ratio de nenos e nenas de toda Galicia.

A produtora Abella está detrás da programación e produción desta sexta edición. A empresa galega traballou en varias das edicións e asumiu a xestión integral do evento o ano pasado, no que aplica a súa experiencia á fronte doutros festivais de cine como o Galician Freaky Film Festival ou o Primavera do Cine. Tamén repite a autora do cartel, Srta. Doti, que de novo logra unha imaxe atractiva e sinxela que expresa imaxinación e paixón polo cinema a calquera idade.

Novas relacionadas:

El Correo Gallego: "Sesenta cortometrajes de todo el mundo compiten este fin de semana en Cinema Miúdo Ames"