O programa inclúe un recital de poemas dos escolares dos colexios de Educación Infantil do Milladoiro, Barouta, Ventín, Agro do Muíño e os IES do Milladoiro e de Bertamiráns. Tamén intervirán o grupo do obradoiro municipal de Lingua e Cultura e o Clube de Xubilados e Pensionistas do Milladoiro.  

Campanas de Bastavales, Adios ríos, adios fontes, Unha vez tiven un cravo ou Negra sombra son algúns dos títulos extraídos da extensa obra rosaliana polos participantes. Ademais, como broche final, o público poderá gozar dun mini-concerto do músico Amancio Prada.  

Para a concelleira de Cultura, Eugenia Martín, contar con Amancio Prada “é un luxo, porque se trata dun artista mítico que dedicou moitas horas do seu traballo artístico a estudar e interpretar a obra de Rosalía. E lembremos que a insigne poeta de Galicia pasou temporadas nunha casa de Ortoño, no noso concello. Por todo isto creo que este 24 de febreiro será un gran día de festa en Ames, festa escolar, poética, musical e social”.    

40º aniversario da edición do disco “Rosalía de Castro”
Amancio Prada naceu en León no ano 1949. A comezos dos anos setenta inicia profesionalmente a súa carreira musical e na actualidade segue en activo tras acumular máis dunha trintena de traballos discográficos. Cancións propias e temas populares compoñen o seu repertorio artístico, que inclúe abundantes pezas escritas en galego, pola súa estreita vinculación con Galicia.  

Este ano cúmprese o corenta aniversario da edición do primeiro disco que Amancio Prada dedicou a Rosalía de Castro. De título homónimo, non foi o único álbum en que o artista homenaxeou á escritora galega, pois en 1997 publicou Rosas a Rosalía e máis tarde, en 2005, Rosalía siempre.