O Concello de Ames está adherido a través dun convenio coa FEGAMP ao acordo de prácticas coa Universidade de Santiago de Compostela (USC). No marco deste convenio, durante o curso 2013-2014 fixeron prácticas no departamento de Urbanismo dúas alumnas da primeira promoción do Máster en Avogacía, que organizan de xeito conxunto o Colexio de Avogados e a Universidade de Santiago de Compostela. Durante os últimos anos, xa estiveron neste mesmo departamento, tres alumnas da Escola de Práctica Xurídica e dúas alumnas de terceiro curso da Facultade de Dereito. Todas elas realizaron prácticas no departamento de Urbanismo.

Ademais, dous alumnos da Facultade de Políticas realizaron prácticas laborais no departamento de Secretaría. Outras cinco persoas, procedentes de diferentes ciclos formativos de Educación Infantil, realizaron as súas prácticas en escolas infantís dependentes do Concello de Ames.

O departamento de Promoción Económica acolleu a un alumno do curso de xestión de recursos humanos que estivo facendo prácticas no Concello, mentres que un alumno de FOREM Galicia de CC.OO., realizou traballos relacionados coa electricidade, dando apoio á brigada municipal de obras.

Por último, dentro da colaboración co IES de Ames, outros dous alumnos do programa de cualificación profesional inicial (PCPI) tamén fixeron prácticas no Concello. Este programa ten como finalidade previr o abandono escolar antes da finalización da escolaridade obrigatoria e abrir novas expectativas de formación e de titulación a mozos e mozas en situación de desvantaxe socio-laboral e educativa.