[21-06-2012] O Concello de Ames, a través da concellaría de Servizos, acaba de abrir o prazo para formalizar a matrícula no programa de Psicomotricidade Educativa e Preventiva que se vai desenvolver tanto en Bertamiráns como no Milladoiro. Todas as persoas que presentaron a preinscrición do seu fillo/a deberán realizar agora a matricula entre o 21 e o 30 de xuño. O impreso de matrícula deberán recollelo no departamento de Educación, situado en fronte á Casa do Concello, ou na Oficina Municipal do Milladoiro, en horario de 9:00 h. á 14:00 horas. Posteriormente, haberá que entregar a documentación no Rexistro Xeral do Concello, en Bertamiráns, ou na Oficina Municipal do Milladoiro. De cara ao vindeiro curso escolar hai 96 prazas dispoñibles.
O Concello de Ames desenvolve o programa de psicomotricidade educativa e preventiva co obxectivo de favorecer no neno/a a expresión das súas vivencias, emocións e medos dun xeito espontáneo a través dunha dinámica de xogo e pracer. Este programa serve de apoio para o desenvolvemento persoal e á maduración do cativo. Ademais, tamén están orientadas a que os nenos/as se acostumen a respectar os demais dentro dun grupo sen que teña que haber conflitos. As actividades de psicomotricidade educativa e preventiva realízanse nas instalacións dos colexios CEIP A Maía, CEIP Agro do Muíño e na Escola infantil do Milladoiro.
As aulas de psicomotricidade dos colexios están preparadas dun xeito especial e inclúen material específico, como colchóns ou módulos de gomaespuma de diferentes cores. Mediante este material os nenos e nenas poden expresar todo aquilo que desexan. Na aula hai dúas normas básicas de convivencia como son as de non danar aos compañeiros e non desfacer o que fan os demais. O programa está dirixido aos nenos e nenas de 3, 4 e 5 anos empadroados no Concello de Ames. As actividades desenvolveranse ao longo do curso escolar en sesións dunha hora á semana.
Prazo para formalizar a matrícula
Todos os pais e nais que presentaron a preincrición do seu fillo/a terán agora que realizar a matrícula. Este ano houbo un total de 77 solicitudes de preinscrición. Debido a que houbo máis solicitudes que prazas ofertadas o martes pasado realizouse un sorteo para ditaminar os nenos e nenas que poderán participar nesta actividade durante o próximo curso. Todos os rapaces e rapazas que non saíron elixidos pasarán a formar parte dunha lista de agarda. Para o próximo curso ofértanse un total de 96 prazas para o programa de psicomotricidade educativa e preventiva.
Para formalizar a matrícula haberá que recoller o impreso de matrícula no departamento de Educación, situado en fronte á Casa do Concello, ou na Oficina Municipal do Milladoiro, en horario de 9:00 h. á 14:00 horas. Posteriormente, haberá que entregar a documentación no Rexistro Xeral do Concello, en Bertamiráns, ou na Oficina Municipal do Milladoiro. O prazo para formalizar a matrícula vai dende o 21 ata o 30 de xuño.
Anteriormente houbo un prazo para que os rapaces e rapazas que este ano participaron nas actividades de psicomotricidade puidesen renovar a súa prazas de cara ao próximo curso escolar. Este ano houbo un total de 63 renovacións correspondentes a rapaces e rapazas de 4 e 5 anos.