En cada categoría haberá un total de seis premios: á regueifa máis brava, á máis aguda, á máis diversa, á máis reivindicativa, á mellor cantada e á mellor falada. A entrega de premios terá lugar o 14 de abril de 2023 no Auditorio de Galicia, en Santiago de Compostela, nun acto que suporá un fin de festa conxunto dos proxectos Enreguéifate e Regueifesta, e que contará coa participación de alumnado de centros educativos de Euskadi e Cataluña, ademais de escolares galegos.

Esta sexta edición do certame inclúe tamén unha serie de accións formativas. Ademais da xornada para o profesorado celebrada o pasado mes de outubro, ata comezos de decembro están a realizarse máis de 60 obradoiros de improvisación oral e regueifa en centros educativos dos concellos de Ames, Carballo, Pontevedra, Santiago de Compostela e Teo, impulsores desta iniciativa que busca difundir a improvisación oral en verso e contribuír á promoción do uso da lingua galega.

No equipo docente hai persoas veteranas na regueifa como son Lupe Blanco, Josinho da Teixeira e O Rabelo, pero tamén unha nova formada de formadoras e formadores integrada por Nuria das Cruces, Lorena Medela, Cristian de Burela e Xairo de Herbón, que confirman a boa saúde da improvisación oral en galego.