[30-12-2017] Por terceiro ano consecutivo o Concello de Ames pon en marcha o programa de conciliación Entroido Lúdico. O prazo de inscrición estará aberto do 1 ao 15 de xaneiro, aínda que as solicitudes non se poderán comezar a presentar ata o día 2. O servizo desenvolverase os días 12, 13 e 14 de febreiro no mesmo horario e coa mesma modalidade coa que se veñen impartindo os demais programas lúdicos. Premendo no enlace que está a túa dereita, baixo o apartado de descargas, poderás obter as bases e o impreso de inscrición do Entroido Lúdico.
O concelleiro de Educación e Cultura, David Santomil, destaca que “en febreiro de 2016 puxemos en marcha este programa de conciliación porque as familias de Ames así o demandaban. Agardamos que pouco a pouco se consolide no tempo como un programa máis dos lúdicos, xa que existen moitos pais e nais que por esas datas necesitan deste servizo para poder conciliar a súa vida laboral e familiar”.
A inscrición pódese realizar nos rexistros do Concello: na Casa do Concello, no departamento de Educación, situado no Pazo da Peregrina de Bertamiráns, ou na Oficina Municipal do Milladoiro. Para obter máis información pódese chamar ao número de teléfono 981 891 476 ou enviar un correo electrónico ao enderezo educacion@concellodeames.gal.
O Entroido Lúdico terá lugar os días 12, 13 e 14 de febreiro no CEIP da Maía, en Bertamiráns, e na EEI do Milladoiro. Este programa de conciliación únese así aos xa ofertados de xeito regular ao longo do ano: o Nadal Lúdico, que se está desenvolvendo dende o pasado 22 de decembro, a Primavera Lúdica, o Xuño Lúdico e mailo Setembro Lúdico, que se suman a outras iniciativas de conciliación como a Escola de Verán.
Esta iniciativa parte do Concello para facilitar á poboación amesá, composta por numerosas familias con nenos e nenas pequenos aos que se dirixen estes programas e que non cesan de medrar, a compatibilidade da vida laboral co coidado dos máis pequenos. Estes programas (os lúdicos e a Escola de Verán) están dirixidos aos nenos e nenas escolarizados no segundo ciclo de educación infantil e en educación primaria.
Contido relacionado
El Correo Gallego: "As familias amesás poden anotarse xa ao concilia de febreiro para o Entroido"