[10-07-2018] O Concello de Ames abrirá hoxe, a partir das 15.00 horas, a área de baño da praia fluvial de Tapia. As analíticas feitas pola Consellería de Sanidade e pola empresa Espina & Delfín deron como resultado que a calidade da auga do río Tambre, ao seu poso por Tapia, é entre bo e excelente. Polo tanto, dende esta tarde volverá a ondear a bandeira verde nesta área fluvial. Independentemente disto dende o goberno municipal vaise solicitar información aos organismos autonómicos correspondentes, para esclarecer o ocorrido no río Tambre dende hai 15 día e que provocou a aparición de peixes mortos e maila turbidez da auga.
Esta mañá coñeceuse o resultado das analíticas feitas pola Consellería de Sanidade e pola empresa Espina & Delfín. En ambos casos o resultado indica que a calidade da auga está entre bo e excelente, polo tanto é apta para o baño. Os parámetros microbiolóxicos analizados foron os enterococos fecais e os escherichia coli. Ambas analíticas dan un resultado moi similar. As mostras indican a existencia de enterococos fecais, pero en cantidade pouco significativa. Cómpre lembrar que os técnicos da Consellería de Sanidade recolleron mostras da auga o pasado domingo, mentres que o persoal de Espina & Delfín recolleu mostras o sábado e mailo luns.
Esta mañá o concelleiro de Servizos Básicos, estivo na praia fluvial de Tapia e constatou que a turbidez da auga xa é menor, así como que non había máis peixes mortos. Blas García apunta que “as diferencias das analíticas feitas son mínimas e débense a que as mostras foron collidas unha o sábado e outra o luns, polo tanto o tempo de diferenza fai que varíen un pouco os parámetros, pero é unha variación mínima”.
Solicitude de información para esclarecer o ocurrido
Asemade, o concelleiro de Servizos Básicos di “independentemente de que esta tarde se abra a zona de baño da praia fluvial de Tapia, dende o Concello vamos pedirlles explicacións a Augas de Galicia e á Consellaría de Medio Ambiente, para esclarecer o ocorrido no río Tambre dende hai 15 día e que provocou a aparición de peixes mortos e maila turbidez da auga”.
Por último, Blas García queixase “da inoperancia da Consellaría de Medio Ambiente e da Dirección Xeral de Conservación da Natureza, xa que o único que fixeron foi remitir o asunto a Augas de Galicia e pasarse a pelota duns a outros sen aclarar nada nin dar ningunha solución". Pola contra, quere "agradecerlle ao xefe do servizo provincial da Consellería de Sanidade a atención prestada e a dilixencia en dar resposta ás demandas de información do Concello de Ames".
Contido relacionado
Compostela 24 Horas: "Hoxe pola tarde quedará aberta ao baño a praia fluvial de Tapia"
El Correo Gallego: "A praia fluvial de Tapia queda aberta ao baño tras uns análisis positivos"
La Voz de Galicia: "La playa fluvial de Tapia reabre a la par que se investiga la mortandad de peces"
Lindeiros: "Aberta ao baño a praia fluvial de Tapia"