O proxecto Apego segue a organizar diferentes propostas lúdicas para as crianzas nestes derradeiros meses do ano. Desta volta, súmase á celebración do Ano Castelao cunha sesión de contos a cargo dunha das mellores contadoras do país, Soledad Felloza. A actividade de balde, para familias con crianzas a partir de 3 anos, será o venres 28 de novembro, ás 18.00 horas, no Pazo da Peregrina, en Bertamiráns.

Nesta actividade tecerase un camiño cheo de historias, emocións e contos que nos introducirán dun xeito lúdico e divertido no universo Castelao, unha das figuras máis importantes de Galicia que defendeu sempre a necesidade de divulgar a arte e a cultura propia na lingua do país.

O prazo de inscrición está aberto dende hoxe, 20 de novembro, ata o vindeiro xoves, día 27. Para participar é preciso enviar un correo ao enderezo electrónico normalizacion@concellodeames.gal no que se indique o nome e apelidos das persoas asistentes, a idade das crianzas e un teléfono de contacto. Non se admitirán inscricións fóra de prazo e as prazas asignaranse por orde de recepción de solicitude.

O programa Apego, un vehículo de transmisión da lingua
O programa Apego é un proxecto de dinamización lingüística dirixido ás familias que estean a esperar un bebé ou que teñan crianzas entre 0 e 6 anos. O seu obxectivo é promover, apoiar e normalizar o uso do galego na socialización da primeira infancia, achegando recursos e unha ampla proposta de actividades lúdicas e educativas.

As persoas interesadas en sumarse á iniciativa poden facelo poñéndose en contacto co Servizo de Normalización Lingüística do Concello de Ames, escribindo un correo a normalizacion@concellodeames.gal ou chamando ao número de teléfono 662 377 215. Así mesmo, tamén poden facelo cubrindo o formulario “Súmate ao apego”, que está dispoñible na páxina web do programa, apego.gal.

Novas relacionadas:

Xornal de Compostela: "O programa Apego organiza en Bertamiráns unha sesión de contos sobre Castelao para familias con crianzas"