Logo de verse na obriga da adiar este “Gran Premio de Supercross Concello de Ames 2018” por mor das condicións meteorolóxicas, chega este domingo a Ames unha das probas de referencia do deporte de motor na nosa comunidade. O circuito SX “Alex de Moure” acollerá unha vez máis o desenvolvemento deste xa clásico Gran Premio do Concello de Ames. O recinto, de máis de 17.000 metros cadrados, conta cun amplo aparcadoiro, situado a escasos metros da pista de competición, e cunhas condicións óptimas tanto para a práctica do deporte como para a contemplación desta modalidade deportiva.

Os participantes inscritos na proba estarán divididos en dez categorías diferentes: féminas, elite, veteranos +38, promoción, hobby (pilotos noveis en competición), promesas 85 cc, promesas, alevíns +8 anos, alevín -8 anos, e alevíns. Ademais, contémplase a posibilidade de crear dúas novas categorías: clásicas e pit-bike, sempre que, tanto sós como xuntos, sumen un mínimo de 7 pilotos, e con un mínimo de tres pilotos por categoría. No caso de que nunha categoría non se chegue a un mínimo de 7 pilotos poderíanse xuntar os pilotos nunha única proba e puntuarse por separado cada categoría.

Pola mañá, entre as 9:00 e as 11:00 horas, desenvolveranse as verificacións técnicas e administrativas. De seguido, a partir das 11:00 horas, os pilotos participarán nos adestramentos libres e de clasificación. Este é o momento no que os deportistas toman contacto coa pista na que van ter que competir e mostrar as súas habilidades. Ás 16:00 horas dará comezo a proba que se compón de dúas mangas por categoría. Ao remate da proba realizarase a entrega de trofeos.