[27-08-2018] O Concello de Ames organiza para todos os veráns un programa de campamentos municipais. Este ano estas actividades comezaron o pasado 28 de xuño e realizaranse ata o 2 de setembro. En total, dito programa inclúe a realización de 11 campamentos diferentes ao do longo do verán. Nove destes campamentos son organizados pola Aula da Natureza e dous pola OMIX. A partir de mañá, 28 de agosto, desenvolverase o último campamento de dito programa. Un total de 40 rapaces e rapazas pasarán 6 días na Granxa Escola Kiriko, situada en Fornelos de Montes. Premendo no enlace que está a túa dereita, baixo o apartado de descargas, poderás obter máis información sobre o campamento da Granxa Escola Kiriko.
Cada campamento, dos 11 que o Concello de Ames organizou para xuño, xullo, agosto e setembro, ten as súas propias características; porén todos comparten o obxectivo de ofrecer ás rapazas e rapaces amesáns unha alternativa de lecer e educativa durante o verán. Sobresae, asemade, o compoñente ambiental común a todos eles. Coa súa organización, o Concello de Ames busca ofrecer unha oferta formativa de desenvolvemento persoal concibida para, de xeito progresivo, dotar ás crianzas e ás mozas e mozos das ferramentas precisas para lograr a autonomía e a independencia, ao tempo que se promove a cooperación e o respecto, ademais dun estilo de vida saudable ligado ao medio natural, ao deporte e á cultura.
Deste xeito, entre o 28 de agosto e o 2 de setembro desenvolverase o último campamento do programa de 2018. Nesta actividade participarán 40 rapaces e rapazas de 6 a 14 anos. A saída está prevista para este martes, ás 10:30 horas, dende o Pazo da Peregrina, en Bertamiráns, e dende a Casa da Cultura do Milladoiro. Os rapaces e rapazas regresarán o domingo, 2 de setembro, arredor das 19:00 horas. Durante 6 días participarán en actividades ambientais, rocódromo, tirolina, actividades de kaiak, padel surf, nunha excursión á praia fluvial de Fornelos, grandes veladas, gravarán unha curtametraxe, etc.
Contido relacionado
Compostela 24 horas: "Os rapaces de Ames viaxarán á Granxa Escola Kiriko"