Apertura e mantemento de vías forestais
Asemade, a práctica laboral permitiría realizar en Ames a apertura e mantemento de vías forestais. Neste caso priorizaranse aqueles camiños que teñen unha maior necesidade de xestión da biomasa tendo en conta o Plan municipal de prevención de incendios forestais. En Santiago de Compostela tamén se realizarán traballos de urbanización e mellora medioambiental no Polígono do Tambre.

A concelleira de Desenvolvemento Económico do Concello de Santiago, Marta Lois, puxo en valor “o traballo e a formación impartida a través deste obradoiro, pero tamén a recuperación de espazos de alto valor ambiental de Santiago de Compostela como é o monte Pedra Castro. Agardamos que estes traballos sirvan de referencia como unha boa práctica do coidado do monte. Por iso temos que agradecervos o traballo que estades facendo porque a recuperación deste monte é grazas a vós”.

O concelleiro de Medio Rural de Santiago de Compostela, Rafael Peña, dixo que “este é un espazo estratéxico para o Concello de Santiago, que limita cos concellos de Ames e Val do Dubra. A través desta iniciativa trátase de ordenar o terreo forestal para evitar que haxa lumes no monte como o que houbo hai tres anos moi preto de aquí na zona do Bachao. Agardamos que actuacións como esta sirvan de exemplo para que os particulares acometan tamén a reforestación das súas fincas utilizando árbores autóctonas, no canto de eucaliptos”.

Os Concellos de Ames e Santiago de Compostela puxeron en marcha no pasado mes de novembro o obradoiro de emprego “CreAs”, que contempla a formación de 20 alumnos/as-traballadores/as (6 de Ames e 14 de Santiago) nas especialidades de repoboacións forestais e tratamentos silvícolas; e de pavimentos e albanelería de urbanización. Este obradoiro terá unha duración de 9 meses, polo que rematará a mediados do vindeiro mes de agosto. Para a impartición de dito obradoiro tamén se conta con persoal directivo, docente e de apoio.

Para o desenvolvemento do obradoiro de emprego “CreAs” cóntase cunha subvención de 287.937 euros da Consellería de Economía, Emprego e Industria, en base á convocatoria de subvencións para os obradoiros de emprego duais. O orzamento total do proxecto é de 357.797 euros, polo que os Concellos de Ames e Santiago achegan a diferencia. Ames achegou 9.860 euros e Santiago 60.000 euros.

Este obradoiro comezou o pasado 12 de novembro. En primeiro lugar, os e as participantes recibiron formación teórica. A finais de decembro comezaron coa parte práctica laboral. Deste xeito, estase actuando no monte Pedra Castro, situado na parroquia de Santa Cristina de Fecha. Así, estanse a mellorar as condicións actuais do monte, mediante a reforestación dunha superficie de algo máis de 11 hectáreas. Para iso empréganse 4.000 árbores frondosas autóctonas galegas, como carballos, sobreiras ou bidueiros. Ademais, o alumnado do obradoiro de emprego está a realizar traballos de limpeza, roza e poda de árbores existentes.

A concelleira de Promoción Económica do Concello de Ames, Isabel González, destacou “a recuperación que se está facendo dun espazo de tanta riqueza ambiental como é o monte Pedra Castro. O traballo en Ames será distinto porque realizarase a limpeza de distintos viarios forestais. Tamén hai que poñer en valor o traballo feito conxunto feito polos Concellos de Ames e Santiago de Compostela para poñer este tipo de obradoiros que combinan formación teórica e práctica laboral. Agardamos que este obradoiro vos serva para unha vez rematado, poidades acceder ao mercado laboral”.

Contido relacionado

La Voz de Galicia: "Alumnos de un taller de empleo recuperan una finca municipal en Fecha"
Lindeiros: "Alumnos de Ames e Compostela recuperan a finca de Pedra Castro no obradoiro de emprego CREAS"