Nesta edición do Setembro Lúdico participarán un total de 150 nenas e nenos, sumando os que participan no Milladoiro e en Bertamiráns. Este programa busca axudar ás familias a compatibilizar a vida laboral e familiar, ofrecendo actividades matinais aos nenos e nenas de segundo ciclo de infantil e educación primaria. O Setembro Lúdico combina actividades programadas que xiran en torno a unha temática común con xogos de tempo libre.

Entre as 9:00 e as 14:00 horas desenvolveranse todas as actividades e xogos que engloba este programa, non sendo os nenos e nenas para os que se lle solicitou o servizo Bos Días, que comezará ás 7:30 horas. As nenas e nenos que non solicitasen o servizo de comedor serán recollidos ás 14:00 horas, os e as demais usuarios sairán ás 16:00 horas.

O Concello de Ames, a través da Concellaría de Educación e Cultura, busca facilitar ás familias a conciliación da vida laboral e familiar durante a época estival mediante programas como o Setembro Lúdico e a Escola de Verán. Deste xeito, o Setembro Lúdico desenvolverase os días 3, 4, 5, 6, 7, 10 e 11 de setembro; entre o final de Escola de Verán e o comezo das clases regulares.

As listaxes definitivas de nenas e nenos admitidos no programa Setembro Lúdico xa poden ser consultadas tanto na sección de avisos da páxina web municipal, como nas oficinas do departamento de Educación situadas no Pazo da Peregrina, nas portas de entrada da Casa do Concello e nas oficinas municipais do Milladoiro.