Este verán 420 rapazas e rapaces participan nos campamentos de verán organizados polo Concello de Ames. Moitos dos campamentos cubriron as súas prazas, como o de Galipark Aventura en Padrón, outros, como os do Xurés, mesmo tiveron que aumentalas para atender a todas as peticións. Esta mañá 100 das crianzas inscritas despediron as súas familias na praza do Concello, en Bertamiráns, e marcharon para pasar catro días e tres noites fóra da casa. O campamento Galipark Multiaventura inclúe diversas actividades: tiro con arco, rutas en bicicleta ou a pé, circuíto de pontes colgantes ou xogos acuáticos na piscina. Ademais o grupo achegarase a Padrón para participar nun “Pequín Express” a pequena escala. As noites, temáticas, comezarán cun serán, outro sobre superheroes e unha última noite de xogos baseada na serie “Prison Break”.

Os monitores vixiarán que nenos e nenas coiden ben das tendas de campaña nas que durmirán en grupos de sete ou oito. Ademais o grupo é responsable de manter limpa e coidada a zona de castiñeiros na que acamparán. O xoves pola tarde, ás 18:30 horas, o grupo de excursionistas retornará a Bertamiráns no autobús.

Para ampliar calquera outra información sobre os campamentos dirixidos ao alumnado de infantil e primaria, así como do campamento urbano poden chamar ao número 660 004 665 ou enviar un correo electrónico ao enderezo auladanatureza@concellodeames.gal. Para solicitar información sobre os campamentos dirixidos ao alumnado de secundaria e bacharelato deben chamar ao número 616 083 229 ou enviar un correo electrónico ao enderezo omix@concellodeames.gal