Actividades para as crianzas dende setembro ata decembro
Nos meses de setembro, outubro, novembro e decembro as familias poderán gozar dun feixe de actividades lúdicas e participativas que lles achegarán recursos para unha crianza positiva, natural e creativa. Neste programa inclúense propostas do departamento de Normalización Lingüística e dos departamentos de Cultura e Bibliotecas.

Trátase dun programa de actividades que está pensado para a ampla variedade de familias que se achegan ao proxecto Apego na procura de actividades, recursos e outras propostas creativas e divertidas que faciliten a socialización en galego das crianzas.

Deste xeito, retómanse os contacontos nas bibliotecas municipais do Milladoiro e Bertamiráns para introducir aos máis cativos na lectura. Así, os días 25, 26 e 27 de novembro será a quenda de "Unha risa de contos". Terán lugar a partir das 17.30 horas na Biblioteca do Milladoiro. As inscricións para a actividade estarán abertas do 17 ao 22 de novembro e pódense facer chamando ao 981 530 807 ou enviando un correo electrónico a biblioteca@concellodeames.gal indicando o nome, apelidos e idade das crianzas que van a participar, xunto cun número de teléfono de contacto.