Actividades para as crianzas dende setembro ata decembro
Nos meses de setembro, outubro, novembro e decembro as familias poderán gozar dun feixe de actividades lúdicas e participativas que lles achegarán recursos para unha crianza positiva, natural e creativa. Neste programa inclúense propostas do departamento de Normalización Lingüística e dos departamentos de Cultura e Bibliotecas.

Trátase dun programa de actividades que está pensado para a ampla variedade de familias que se achegan ao proxecto Apego na procura de actividades, recursos e outras propostas creativas e divertidas que faciliten a socialización en galego das crianzas.

Deste xeito, a programación do Apego no mes de outubro comezará coa proposta "Onde nace a lingua" de Marta Ortiz, que chegará á Casa da Cultura do Milladoiro o venres 3 cunha proposta de contos, adiviñas, trabalinguas, cancións de mans e unha chea de recursos con música, instrumento e obxectos para ir traballando o ritmo e asentando as competencias lingüísticas dun xeito divertido e participativo.