O proxecto Apego pon fin á súa programación para o primeiro semestre deste 2025, co obradoiro de cianotipia “Fotografando as herbas de San Xoán”, de Alouette Machine. Nesta última actividade, que se desenvolverá o venres 20 de xuño, a rapazada realizará diferentes fotocomposicións empregando a luz do sol e a auga. A cianotipia é un proceso de impresión fotográfica moi antigo que serve para crear imaxes en tons de azul.

Deste xeito, os nenos e nenas, poderán ir aprendendo a recoñecer as herbas de San Xoán, ao mesmo tempo que poñen en valor a lingua e o patrimonio cultural e ambiental. 

Esta actividade é de balde e está dirixida a un público familiar con crianzas a partir de 3 anos. Desenvolverase a partir das 18.00 horas no Parque do Ameneiral, en Bertamiráns. O prazo de inscrición está aberto ata o vindeiro xoves, 19 de xuño e, para participar, é preciso enviar un correo ao enderezo electrónico normalizacion@concellodesmes.gal no que se indique o nome e apelidos das persoas asistentes, idade das crianzas e un teléfono de contacto.