Neste pasado mes de abril, botaron a andar as novas unidades VIDOC (Vehículos Integrais de Documentación) da Policía Nacional, que incorporan varias novidades con respecto ás anteriores unidades móbiles que percorrían os concellos galegos periodicamente.

Entre as primeiras paradas destes novos vehículos VIDOC na provincia da Coruña atópase Ames, pois visitarán o noso concello no vindeiro mes de xuño. Deste xeito, os días 2 e 3 estarán na Casa da Cultura de Bertamiráns e, o día 4 de xuño, na Casa da Cultura do Milladoiro. Os horarios do servizo manteranse como viñan sendo habitualmente, sendo de 9.00 a 12.30 horas.

Por outra banda, estas novas unidades VIDOC poderán atender ata a 44 persoas diarias. Haberá dispoñibles dúas unidades móbiles, atendendo así 22 citas cada unha delas. As persoas interesadas en pedir cita no Concello de Ames, deberán enviar un correo ao enderezo electrónico gabinete@concellodeames.gal ou chamar ao número 881 074 730 indicando nome, apelidos e un teléfono de contacto.

Axilización do proceso e máis servizos incorporados
Estas novas unidades de documentación traballan desde unha furgoneta equipada con dous postos de expedición, onde apoderán atender diariamente a 44 persoas e, ademais de realizar a renovación ou expedición do DNI como viña sendo habitual, a cidadanía poderá facer o mesmo trámite co Pasaporte e modificar ou actualizar as súas claves electrónicas, xa que tamén contan cun Punto de Actualización de Documentación (*PAC).  

Ademais de aumentar o número de trámites que se poden realizar a través destas unidades móbiles, os tempos de xestión tamén se reducen considerablemente. Deste xeito, as persoas que pidan cita neste servizo poderán ter listo calquera dos dous documentos en escasos dez minutos, mentres que coas anteriores unidades precisábanse tres días para a xestión completa (un día para realizar a pegada dactilar, outro para impresión nunha comisaría e un terceiro día para a posterior entrega).