O departamento de Bibliotecas municipais de Ames, continúa coas presentacións do programa “Encontros Literarios, unha iniciativa que ten como obxectivo principal promover a literatura en galego, xunto con dar a coñecer novos escritores ou autores próximos.

Nesta nova sesión, o protagonista será o mestre e escritor Toño Núñez, que presentará a o seu libro “Mea Culpa”. O autor estará acompañado de Armando Requeixo, investigador, profesor e crítico no ámbito da literatura en galego. A presentación terá lugar mañá, mércores día 21 de maio, ás 20.00 horas, no Pazo da Peregrina, en Bertamiráns.

“Mea Culpa” de Toño Núñez
O autor leva ligado ao mundo da literatura dende hai varias décadas, escribindo en varios xéneros literarios, dende literatura infantil, ata poesía ou artigos de opinión. Esta obra é unha recompilación de relatos, nos que o autor invita á reflexión sobre unha ampla variedade de temas, habituais no universo literario como poden ser o amor, a dor, as inxustizas ou a propia vida e a morte.

Nesta liña, a través do estilo narrativo empregado ou as temáticas que se tratan en gran parte das narracións da obra, faise referencia a outras grandes figuras da literatura galega coma Ánxel Fole, Xosé Neira Vilas, Uxío Novoneyra, Manuel María ou Álvaro Cunqueiro.