Xa coñecemos as regueifas premiadas na sétima edición do certame Enreguéifate, o proxecto impulsado polos Concellos de Ames, Carballo, Pontevedra, Santiago de Compostela e Teo que apoia a difusión da improvisación oral en verso (regueifa) para contribuír por medio dela á promoción do uso da lingua galega. Como en edicións anteriores, o certame contou con dúas categorías: unha xeral, para calquera persoa, e outra escolar, para o alumnado dos centros educativos galegos non universitarios; e cun total de seis premios en cada unha das categorías: á regueifa máis brava, á máis aguda, á máis diversa, á máis reivindicativa, á mellor cantada e á mellor falada.

O programa Apego continúa co seu programa de actividades coa sesión de  contos con música “Lúa Triangular. Nada é imposible”, de Jara Ortiz, que vai ter lugar na Casa da Cultura do Milladoiro o venres 8 de marzo, ás 18:00 horas. Os/as interesados/as en anotarse poden facelo enviando un correo electrónico ao enderezo normalizacion@concellodeames.gal desde hoxe e ata o 7 de marzo, no que se indiquen nome e apelidos das persoas asistentes, idade dos nenos/as e un número de teléfono de contacto. A programación do Apego para o primeiro semestre do 2024 pode consultarse premendo nesta ligazón.

Este venres, 23 de febreiro, a Casa da Cultura de Bertamiráns acollerá, a partir das 19:00 horas, a Gala homenaxe a Rosalía de Castro. Trátase do acto central da programación rosaliana que organiza o Concello de Ames para conmemorar o aniversario da escritora que se celebra o 23 de febreiro, ao tempo que se pon en valor o seu vínculo co concello e se revitaliza o seu pensamento e a súa obra. Para a súa organización cóntase coa colaboración dos equipos de dinamización e normalización lingüística dos centros de ensino de Ames. A entrada será libre e gratuíta ata completar o aforo.

O proxecto Youtubeiras celebrou este sábado, 17 de febreiro, a gala de entrega dos seus premios no Teatro Principal de Santiago de Compostela. Ao longo do acto, presentado por Nuria Vil e Gabri Fuentes, entregáronse oito galardóns, todos eles acompañados dunha dotación económica. Nesta edición presentáronse 68 canles diferentes, ás que hai que sumarlle os 24 vídeos propostos pola audiencia a través das redes sociais, o que supón máis de 32.400 minutos de contidos en galego en Youtube.