O Concello de Ames, a través da Concellaría de Xestión do Medio Natural e Atención ao Rural, está traballando na creación de comunidades enerxéticas. Para elo este martes, 16 de xullo, ás 20.00 horas, haberá unha charla informativa no local social de Trasmonte, para informar á veciñanza da posibilidade de crear comunidades enerxéticas. No pasado mes de maio xa se fixo unha primeira xuntanza informativa neste mesmo centro social. Esta segunda xuntanza foi solicitada por varias persoas interesadas para coñecer como formar a primeira comunidade enerxética do concello de Ames.

O Concello de Ames presentou esta mañá o plan municipal de incendios forestais de 2024, que inclúe as actuación en materia de prevención de incendios e mailo dispositivo municipal de actuacións ante lumes forestais para o período estival deste ano. A finalidade deste dispositivo municipal dentro do Plan de Incendios na temporada de alo risco, que vai do 1 de xullo ao 30 de setembro, é a organización dos distintos medios persoais e materiais cos que conta o Concello para actuar dun xeito rápido e eficaz fronte a posibles incendios forestais que poidan desenvolverse no concello. O obxectivo é que ante un incendio forestal cada grupo de intervención saiba cal é a súa labor evitando ou minimizando os imprevistos e facilitando a colaboración do Concello co director/a de extinción. Premendo nesta ligazón podes descargar o plan municipal de incendios forestais de 2024.

As Concellarías de Xestión do Medio Natural e Turismo organizan para este domingo unha nova camiñada teatralizada, a cargo dos Quinquilláns, que se vai a realizar o vindeiro domingo, 30 de xuño, polas Fragas do Tambre. Esta actividade, que se desenvolverá en horario de mañá, de 10.00 a 14.30 horas, arranca na aldea de Oca e discorre pola capela do Corpiño e preto do río Tambre, rematando no Pazo de Lens. O percorrido ten unha distancia de 4 quilómetros e ao remate serviranse uns petiscos saudables. Para participar é preciso inscribirse antes das 14.00 horas deste venres 28 de xuño. Para iso hai que enviar o impreso de inscrición ao enderezo auladanatureza@concellodeames.gal. Ofértanse un total de 40 prazas. Haberá servizo de autobús. Para máis información pódese chamar aos números de teléfono: 660 00 46 65, 609 92 36 16 ou 649 45 02 64. Recoméndase levar roupa cómoda e auga.

A semana pasada comezaron os traballos de limpeza subsidiaria no lugar de Costoia, pertencente á parroquia de Biduído, onde se están limpando tres parcelas que suman unha hectárea de superficie. Ademais, está previsto que se realicen traballos de xestión da masa forestal no monte do Galiñeiro, no lugar de Maguxe, pertencente á parroquia de Ortoño. Neste caso vanse limpar 20 parcelas, que suman unha superficie de 2,5 hectáreas. Estes traballos enmárcanse dentro do convenio de colaboración, que asina anualmente o Concello coa Xunta, Fegamp e Seaga, para a xestión da biomasa forestal da rede de faixas secundarias que veñen establecidas na Lei 3/2007, do 9 de abril, de prevención e defensa contra os incendios forestais de Galicia.