Pasadas as tres semanas que se deron de prazo para presentar posibles achegas, onte mércores 17 de xullo realizouse unha xuntanza de traballo da comunidade educativa que compón o Consello Escolar Municipal de Ames. En dita xuntanza traballouse na modificación da Ordenanza fiscal reguladora da taxa pola prestación dos servizos complementarios educativos e de conciliación do Concello de Ames.

O Concello de Ames oferta para este verán un amplo abano de programas e actividades para os nenos/as e mozos/as co obxectivo de que se manteñan entretidos e se divirtan durante a época estival na que non hai actividade académica. Con estes programas preténdese axudar ás familias amesás a compatibilizar a vida laboral e a familiar. Dentro dos programas lúdicos realízanse o Xuño Lúdico, a Escola de Verán e mailo Setembro Lúdico, nos que hai inscritos 1.278 usuarios/as. Non se contabilizan os usuarios/as do Setembro Lúdico debido a que na actualidade está aberto o prazo de inscrición para este programa. Nos campamentos municipais de verán hai inscritos 490 nenos/as e mozos/as. Cubríronse o 98% das 500 prazas ofertadas. Ademais, este ano, como novidade, púxose en marcha o programa de conciliación dirixido á mocidade con diversidade no que hai 12 usuarios/as. En total, contabilízanse 1.780 usuarios/as nestes programas, a falta da participación no Setembro Lúdico.

O salón de plenos da Casa do Concello acolleu o pasado martes , 25 de xuño, unha nova xuntanza do Consello Escolar Municipal de Ames, onde o Goberno presentou unha proposta sobre a modificación da Ordenanza fiscal reguladora da taxa pola prestación dos servizos complementarios educativos e de conciliación así como do borrador para a modificación do Regulamento da Rede municipal de comedores escolares, Bos Días Cole e Tardes Divertidas. Dita proposta recolle engadir novos tramos ás cotas de comedor, incrementalas en comedor, lúdicos e Escola de verán entre o 10,5%-11% e non modificar os programas Bos Días e Tardes Divertidas durante o curso 2024-2025. Nos seguintes cursos modificarase a ordenanza para todos os servizos de conciliación conforme ao IPC.

O IES do Milladoiro, en colaboración coa ANPA do IES do Milladoiro e co Concello de Ames, organizou unha serie de actos para hoxe, venres 21 de xuño, co obxectivo de celebrar seu o décimo aniversario. Deste xeito, ás 10.00 horas inaugurouse na Casa da Cultura do Milladoiro a exposición “Ao son da Oralidade, da pedra á palabra”. Esta exposición é froito dun traballo de investigación colaborativo do alumnado do IES Milladoiro co do IES Marco do Camballón, e foi gañadora do premio Antonio Fraguas do Museo do Pobo Galego. A maiores, no marco da celebración do décimo aniversario, no auditorio da Casa da Cultura celebrouse unha gala na que participaron alumnos/as e profesores/as de diversos niveis. Foi unha gala chea de emoción, arte e creatividade, na que se fixo un  percorrido por estes dez anos de ensino público.