As bibliotecas municipais de Bertamiráns e O Milladoiro abren o ano con novas sesións de contacontos para as crianzas amesás, así como demais actividades de fomento da lectura, entre as que se atopan un obradoiro para rapaces e rapazas de 3º de primaria en diante ou o xa tradicional Concurso de debuxo.

O departamento de Bibliotecas do Concello de Ames, enmarcado dentro da Concellería de Cultura, Turismo, Axenda Urbana e Comunicación, vén de anunciar a programación de actividades que se levará a cabo nas bibliotecas do Milladoiro e Bertamiráns durante os primeiros seis meses do ano 2026, na que se inclúe as actividades de contacontos e uns obradoiros lúdicos para os máis cativos de Ames.

Este xoves, 4 de decembro, ás 20.00 horas, o Pazo da Peregrina acolle unha nova sesión dos Encontros Literarios, organizados polo departamento de Bibliotecas Municipais de Ames, coa presentación da obra “Las trampas de la pornografía: la sexualidad que deseamos”, escrito polas autoras galegas Amada Traba, Priscila Retamozo e Chis Oliveira. Durante o acto tamén intervirá o profesor de filosofía, especialista en masculinidades, Xosé Cabido. Coma sempre, a entrada será libre ata completar aforo. 

As Bibliotecas municipais de Ames continúan coa súa programación de outono. Deste xeito, organizan o obradoiro “Pequenos artistas. Descubrindo a Castelao” no que os máis pequenos poderán descubrir e aprender sobre unha das figuras máis relevantes da cultura galega. A actividade desenvolverase o sábado 22 de novembro en Bertamiráns e o venres 5 de decembro no Milladoiro. O prazo de inscrición para participar na quenda de Bertamiráns está aberto desde o pasado luns, día 10, ata o vindeiro 19 de novembro. Para participar, é preciso enviar un correo electrónico ao enderezo biblioteca@concellodeames.gal indicando nome, apelidos, curso e idade das crianzas participantes xunto cun número de teléfono de contacto.