“Un alento de vida” é o lema da campaña informativa da Axencia Galega de Sangue, Órganos e Tecidos (ADOS) para animar á veciñanza a doar e acadar as doazóns de sangue que precisan os hospitais galegos para atender a milleiros de doentes.

O obxectivo desta campaña é informar á veciñanza e dar as máximas facilidades co desprazamento das unidades móbiles a máis de 170 concellos galegos, que realizarán arredor de 800 desprazamentos para achegar a doazón de sangue ás cidades, vilas e parroquias de Galicia. Coa suma de esforzos de todos será posible acadar as máis de 20.0000 doazóns de sangue que precisan os hospitais galegos, para atender a preto de 6.500 doentes que requiren tratamento con compoñentes do sangue para recuperar a saúde.

Unidade móbil de doazón en Ames
Cada día os hospitais galegos precisan entre 400 e 500 doazóns de sangue para manter a súa actividade. Os hospitais galegos atenden cada día unha media de 2.800 urxencias, máis de 800 intervencións cirúrxicas e 1 transplante de órganos. Por iso, desde o Concello de Ames, anímase á veciñanza a acudir a esta unidade móbil de doazón, que estará estacionada esta semana nos dous principais núcleos urbanos do concello. O venres, 16 de outubro, estará na praza da Maía, en Bertamiráns, en horario de 15:30 a 21:00 horas.

Os únicos requisitos para poder doar son ser maior de 18 anos e pesar máis de 50 quilos. É necesario almorzar e esperar dúas horas para acudir despois de xantar. As persoas doantes deberán identificarse coa súa tarxeta de doazón, DNI ou documento similar. Ademais, haberá que informar ao médico se se está tomando algún tipo de medicamento.