Tres nenas (Mariam, Duaa e Fadala) repetiron experiencia e participaron durante este verán no programa Vacacións en Paz 2026 con familias de acollida amesás. Mariam participou neste programa durante cinco anos; Fadala leva catro anos; e Duaa tres anos. As familias acolledoras destacaron que para elas todos os anos é unha experiencia moi enriquecedora.

A súa estancia en Ames é posible grazas ao programa Vacacións en Paz, que organiza a Asociación Solidariedade Galega co Pobo Saharauí (SOGAPS). A iniciativa consiste en que os cativos e cativas, que viven en campos de refuxiados en Tindouf (Alxeria) poidan escapar das altas temperaturas que se acadan durante o período estival no deserto saharauí, así como pasar revisións médicas, aprender galego e castelán e evadirse da súa realidade durante unhas semanas.

As crianzas visitaron este mércores, 2 de setembro, o salón de plenos da Casa do Concello, onde tivo lugar unha recepción oficial. As rapazas, xunto coas súas familias de acollida, foron benvidas polo alcalde, Blas García, a concelleira de Benestar Social, Uxía García, o técnico de integración social, Leo Pena; así como por diversos concelleiros e concelleiras do Goberno municipal e dos grupos políticos municipais do Partido Popular, BNG e Espazo Común.

O alcalde de Ames, Blas García, explicou que “con este acto que facemos hoxe no salón de pleno queremos saudar as nenas e saber como estiveron e como o pasaron durante o verán en Ames. Por iso, o primeiro, é darlle as gracias ás familias acolledoras porque sen elas este programa non pode desenvolverse. A situación que se vive no Sáhara é complicada, por iso nesta cuestión debemos estar todos e todas unidos, para cando chegan persoas de fóra, tratalos o mellor posible e integralos na nosa sociedade. Creo que Ames é un concello integrador, queda demostrado xa que no noso municipio conviven persoas de máis de 70 nacionalidades distintas”.

A concelleira de Benestar Social, Uxía García, dixo “eu como concelleira e familia acolledora teño unha dobre parte neste programa. Como concelleira teño que dicir que imos seguir coa labor xa desenvolvida por outras compañeiras e compañeiros anteriormente, e seguir apoiando a realización do programa Vacacións en Paz. Hai anos que tivemos oito nenas e nenos, este ano temos tres, depende das circunstancias persoais e laborais das familias. O importante é seguir contado coa implicación das familias, e en Ames sempre temos esa implicación”.

O técnico de integración social, Leo Pena, agradeceu “a labor das familias que son o piar fundamental desta iniciativa. O Concello de Ames, a través deste programa, achega un pouco de alegría, felicidade e diversión a estas nenas. Agora tócalles volver xunto das súas familias e gustaríanos que no seu territorio puideran ter as mesmas condicións que tiveron aquí. Todos os días deberíamos ter presente que todos somos seres humanos e que todos buscamos e desexamos o mesmo, que son unhas condicións de vida dignas e unhas posibilidades reais de desenvolvernos coma persoas, e de criar aos nosos fillos e fillas nas mellores condicións posibles”.    

As nenas saharauís contaron o que fixeron durante este verán en Ames e noutros lugares de Galicia e tamén recibiron unha mochila con material escolar. Como cada ano, ademais de actuar de mediador entre as familias amesás e SOGAPS, o Concello de Ames colabora co programa Vacacións en Paz achegando o importe dos billetes de avión de ida e volta de cada neno/a.

Novas relacionadas

La Voz de Galicia: "Ames despide a las tres niñas saharauis que pasaron el verano en el municipio"