As Noites en Vela volven A Ponte Maceira, despois de que o ano pasado tiveran que facerse no auditorio da Casa da Cultura de Bertamiráns por mor da meteoroloxía. Deste xeito, este gran monumento e paisaxe natural volverá a apagar o seu alumeado público para que centos de persoas gocen dunha velada única de música e cultura este sábado 18 de xullo.

Este programa, organizado conxuntamente entre os departamentos de Cultura de Ames e Negreira, busca poñer en valor unha paraxe paisaxística e monumental como é A Ponte Maceira, declarada ben de interese cultural (BIC) no ano 2022 e localización que forma parte da listaxe dos pobos máis bonitos de España.

Neste 2026, os grupos encargados de amenizar a noite do 18 de xullo serán Balteira e mailo grupo de gaitas amesán da Asociación Cultural Follas Novas. A actuación de Balteira está subvencionada polo programa Cultura no Camiño da Xunta de Galicia. Ademais, haberá un espectáculo pirotécnico que poñerá o punto final á velada. O acceso ao evento é de balde.

Balteira
O cuarteto Balteira nace a finais do 2025 en Betanzos da man de Cris Sánchez e Noa Migal (voces e percusións), Álex Fente (acordeón) e Pablo Pacior (ventos). A súa proposta céntrase na recuperación do repertorio oral galego, incorporando arranxos contemporáneos pero respectando a estrutura e a emoción das pezas tradicionais.

Os cantares que sempre encheron de festa os torreiros e as melodías instrumentais para o baile, son o eixo sobre o que xiran os seus concertos, mantendo o espírito da foliada desde a calidade técnica e interpretativa destes catro grandes da nosa música tradicional. Entre as gravacións xa editadas, destacan o Maneo de Anxeriz, con arranxo de Pedro Lamas, e a Muiñeira de Bardaos.

Os seus integrantes proceden de proxectos tan recoñecidos como Tiruleque, Xose Lois Romero & Aliboria, Comando Curuxás ou Habelas Hainas, e contan cunha grande bagaxe como intérpretes e docentes de música tradicional en diferentes asociacións e escolas de todo o país.

O nome da agrupación fai referencia á soldadeira medieval María Pérez “A Balteira”, figura histórica vinculada á liberdade e á transgresión social; fonte de inspiración e símbolo do carácter renovador do proxecto. Balteira é a forza da renovación na tradición galega.

Grupo de gaitas da AC Follas Novas
Por outra banda, o grupo de gaitas da Asociación Cultural Follas Novas está formado por socios/as e alumnos/as da asociación para difundir a música galega e colaborar animando as festas dos veciños en diferentes eventos (festas, actividades culturais...). Desta volta, participarán nas Noites en Vela interpretando varios temas de música tradicional galega.