O núcleo de Trasmonte, situado na parroquia do mesmo nome, gozará nos vindeiros meses dunha importante mellora no seu viario, continuando así o investimento do Concello de Ames nas súas infraestruturas e no rural. Nesta ocasión, a Xunta de Goberno Local do pasado 4 de agosto aprobou unhas obras que servirán para mellorar a capa de rodaxe dun treito de 825 metros de lonxitude e a construción dunha cuneta transitable de formigón. As obras contan cun orzamento inicial de 156.527,97 euros e están incluídas no POS+ 2021 da Deputación da Coruña.

Características técnicas das obras

Nunha lonxitude de 825 metros e cun ancho medio de 5 metros preténdese a mellora da capa de rodaxe, con 5 cm de aglomerado en quente, previa reparación de fochancas, e perfilado de mordentes con grava e tratamento asfáltico semiprofundo.

Ademais, en 660 metros do mesmo trazado contémplase a continuación da gabia transitable de formigón, cun ancho medio de 1,5 metros baixo a que se canalizará a recollida de pluviais e o alumeado público, cos seus correspondentes sumidoiros e arquetas.

Completarase a actuación coa limpeza previa de gabias e salvagabias para a correcta drenaxe lonxitudinal e transversal, e co pintado das marcas viarias.

A actuación está incluída no POS + 2021 da Deputación da Coruña, que abrangue outras melloras nas infraestruturas do rural amesán, como as obras de pavimentación de interiores e accesos do núcleo de Ventín, na parroquia de Biduído, ou o recentemente aprobado proxecto de mellora da estrada que une Vilar e Quintáns, na parroquia da Ameixenda.

O alcalde de Ames e concelleiro de Obras e Servizos Básicos, Blas García, quixo poñer en valor a aposta do Goberno municipal polo rural amesán. “Estamos traballando e mellorando moitos núcleos, ademais de realizar outros investimentos importantes como o alumeado led ou a mellora dos servizos no rural". O alcalde engadiu que “apoiamos o rural pese á situación actual, onde realizar obras é moi complicado. Con todo, seguimos traballando e facémolo a bo ritmo".

Novas relacionadas:

La Voz de Galicia: "Ames licita por 157.000 euros mejoras viarias en Trasmonte"

El Correo Gallego: "Mejoran calzada y cunetas en la vía que arropa la iglesia de Trasmonte"