No pavillón polideportivo do Milladoiro creouse un aparcamento adaptado, dentro dos xa existentes, que cumpre a normativa coas súas dimensións e bandas perfectamente delimitadas e pintadas, así como habilitouse un punto de acceso á beirarrúa con paso de peóns adaptado. No espazo próximo á entrada, onde se atopa o soportal norte do edificio, habilitouse un ascensor exterior, cunha estrutura envolvente metálica. A través deste ascenso as persoas con diversidade funcional poden acceder a zona da bancada do pavillón polideportivo. O ascensor dispón dunha cabina cun lateral de cristal e o resto opacos de chapas de aceiro.

Ademais, realizouse unha reestruturación dos aseos públicos da planta superior redefinindo os espazos e creando un aseo adaptado por sexo. Asemade, levouse a cabo unha remodelación dos espazos e divisións en vestiarios para permitir un aseo completo adaptado por sexo que dispoña de ducha adaptada coas súas barras, asento, sumidoiro e tipo de pavimento apto de maneira integrada, ademais da adaptación das portas existentes.

Por último, colocouse unha barreira metálica e con cristal na zona da bancada do pavillón, onde se poden colocar os espectadores con cadeiras de rodas, e levouse a cabo a adaptación física do mostrador de atención en conserxería para persoas con discapacidade. Estas obras foron adxudicadas á empresa Construcciones Iglesias Mera SL por un importe de 68.500 euros, IVE incluído. Este proxecto foi sufragado a través do Plan único de concellos POS+ 2018.

Mellora da accesibilidade na rúa Agro do Medio
O obxectivo da intervención feita na rúa Agro do Medio foi conseguir que sexa un espazo publico que poida ser utilizado por todas as persoas con independencia da súa condición e o seu nivel de mobilidade. Por tanto, con carácter xeral resolvéronse os vaos que non estaban adaptados correctamente e supoñían unha barreira para usuarios/as de mobilidade reducida ou usuarios/as de cadeiras de rodas e/ou persoas con problemas de visión.

Deste xeito, rebaixáronse a cota 0 o nivel das beirarrúas tanto nos pasos de peóns coma nos vaos. Nalgúns casos créanse novos vaos e pasos de peóns alí onde se diagnosticaron as barreiras arquitectónicas de carácter urbanístico. Tamén se colocou novo mobiliario público como bancos accesibles e unha marquesiña de autobús. Estas obras foron adxudicadas á empresa Construciones J. Mauri e Hijos SL por un importe de 84.277 euros.

O concelleiro de Obras e Servizos Básicos, Blas García, destaca que “o goberno municipal destinou máis de 150.000 euros a dotar de accesibilidade universal a unha das principais rúas do Milladoiro como é Agro do Medio, así como ás instalacións do pavillón polideportivo deste localidade. Deste xeito, o goberno municipal continúa apostando polo investimento en mellora da accesibilidade, logo dos traballos desenvolvidos en varias instalacións do Milladoiro, na Casa do Concello, praza do Concello, e na praza da Maía, en Bertamiráns, así como nas instalacións da praia fluvial de Tapia”.

Ademais, o concelleiro destaca que “desde que chegamos ao goberno investimos en torno a un millón de euros en algo tan necesario como facilitar a accesibilidade ás persoas con problemas de mobilidade. Durante este mandato seguiremos apostando de maneira clara por facer Ames máis accesible”.