[21-12-2018] A oficina municipal de información xuvenil (OMIX) organizou durante os meses de novembro e decembro o ciclo formativo “Máis que 2.0”, que estivo dirixido á mocidade amesá. Dentro de dito ciclo organizáronse un obradoiro de marketing dixital e outro de emprendemento xuvenil. O primeiro deles foi impartido na Aula Cemit, da Casa da Cultura de Bertamiráns, e o segundo realizouse en varias sesións no IES de Ames para o alumnado de 4º de ESO e 2º de bacharelato. En total participaron 46 mozos e mozas de Ames.
Co obxectivo de apoiar á mocidade na súa formación, de cara ao seu futuro profesional, a OMIX de Ames organizou, durante os meses de novembro e decembro, dous obradoiros ao abeiro do programa de accións formativas Lidera. En total participaron 46 mozos e mozas nestes obradoiros que remataron este xoves, 20 de decembro, e que se enfocaron á mellora do perfil persoal e profesional dos participantes. Este ciclo no que se traballou o emprendemento e o manexo das novas tecnoloxías e ferramentas web dividiuse en dúas actividades.
O obradoiro de emprendemento xuvenil impartiuse no IES de Ames e estivo dirixido aos mozos e mozas de 4º de ESO e bacharelato. A través desta actividade traballouse co alumnado, tanto nocións básicas de emprendemento, como a planificación e a posta en marcha dun proxecto emprendedor.
Neste obradoiro traballáronse nocións básicas do emprendemento: Como se inicia un/ha emprendedeor/a??; Onde se forman?; A comunicación como ferramenta indispensable; A motivación como motor do emprendemento; Aspectos legais do lanzamento dun proxecto… Tamén se abordou a planificación e posta en marcha dun proxecto emprendedor (a idea, a rentabilidade do proxecto, viveiros de empresa e cámaras de comercio,...) e coñecemento e análise de exemplos reais de startups galegas moi interesantes (apps, plataformas e ideas innovadoras con premios e recoñecementos).
Por outra banda, tamén se impartiu un taller sobre marketing dixital, que se desenvolveu os días 10, 12 e 14 de decembro na aula CeMIT da Casa da Cultura de Bertamiráns, en horario de 17.00 a 20.00h. Nesta ocasión, os asistentes recibiron formación sobre aspectos como o posicionamento en buscadores, blogs, boletíns, afiliacións ou banners, así como as funcións do Community manager, o deseño e presenza nas redes, ou a creación dun plan de marketing dixital.
