Tralo éxito acadado na pasada edición, na que se recibiron máis de 2.500 propostas procedentes de todo o mundo, o concurso está aberto a películas de todas as procedencias co obxectivo de garantir unha programación diversa e intercultural, que amose a actualidade da produción cinematográfica de ámbito infantil e reflicta o mundo da infancia dende unha óptica global. Asemade, poden inscribirse tanto curtametraxes como longametraxes pertencentes a xéneros de ficción, documental ou animación, sempre que sexan obras orientadas a un público infantil.

As curtametraxes seleccionadas que competirán no concurso dividiranse nas categorías ‘Axóuxeres’, na que entrarán todas aquelas orientadas a cativos/as de 0 a 3 anos con duración máxima de 10 minutos; e ‘Buxainas’, formada polas obras de menos de 25 minutos dirixidas a nenos e nenas maiores de 3 anos. Estas obras finalistas poderán optar a dous premios de 500€, en función do rango de idade ao que vaian dirixidas.

Tamén haberá diversas sesións fóra de concurso completando o programa, nas que se proxectarán longametraxes dirixidas a un público infantil, que recibirán unha taxa única de 250€ pola súa exhibición no Festival.

O Festival Cinema Crianza nace no ano 2017 como o primeiro festival internacional de cine infantil en Galicia. O obxectivo deste proxecto, organizado polo Concello de Ames co apoio da Deputación da Coruña, é reivindicar o audiovisual como ferramenta pedagóxica ao tempo que busca promover o gusto polo cinema entre os máis cativos e contribuír á formación dun público futuro con sensibilidade artística, interese cultural e espírito crítico ante o consumo audiovisual.