No ano 2014 xurdiu a entidade “Nosa Enerxía”, a primeira cooperativa galega que comercializa enerxía eléctrica de orixe renovable certificada a través de GoiEner. Trátase dunha cooperativa de consumidores que ten o obxectivo de primar o uso de enerxías renovables, así como a promoción de proxectos de xeración de enerxía renovable de maneira distribuída. A entidade Nosa Enerxía é a maior cooperativa de consumo de Galicia e xa conta con 405 socias/os.

O alcalde de Ames, José Miñones, dixo que “o goberno municipal aposta por un modelo enerxético diferente, baseado nas enerxías renovables, que considere a subministración eléctrica un ben público. En maio de 2016 asinamos o primeiro contrato con esta cooperativa para subministrar enerxía ás instalación da Aula da Natureza. Agora dámoslle continuidade a este proxecto coa sinatura de 11 novos contratos para subministrar enerxía eléctrica ás escolas unitarias, locais sociais e ás instalacións do Punto Limpo”.

A través da sinatura destes 11 novos contratos subministrarase enerxía eléctrica á escola unitaria de Covas, local social de Cruxeiras, local social de Biduído, antiga escola de Firmistáns (que na actualidade está sendo rehabilitada para dedicala a vivenda de tránsito e de uso veciñal), escola unitaria da Tarroeira, local social de Biduído de Abaixo, local social de Augapesada, local social de Trasmonte, antiga escola de Guimaráns, local social de Piñeiro e ás instalacións do Punto Limpo, situado no polígono do Milladoiro. Así, pasase a dispor de 12 contratos con Nosa Enerxía. O cambio efectivo de ditos contratos afectará ás facturas do mes de decembro.

A concelleira de Economía e Facenda, Genma Otero, responsable do departamento de contratación, explicou “seguimos dando pasos no tocante á defensa e posta en práctica dunha compra pública responsable que inclúe criterios sociais e medioambientais, apostando pola contratación con aquelas empresas e/ou cooperativas que impulsan e practican este tipo de políticas. A cooperativa Nosa Enerxía é unha cooperativa galega que está traballando na promoción de proxectos de xeración de enerxía renovable e que defende a eliminación da pobreza enerxética, políticas sostibles que este goberno quere impulsar como medidas de responsabilidade social”.

Segundo concello galego en traballar con Nosa Enerxía
Ames é o segundo concello de Galicia que comezou a traballar con esta entidade. Previamente xa o fixo Rianxo. Ademais, o goberno municipal está aberto a colaborar con esta cooperativa noutros proxectos que leve a cabo no uso e fomento das enerxías renovables. Asemade, o goberno de Ames reclama, tal e como se aprobou en Pleno, protección contra a pobreza enerxética e aposta por unha tarifa eléctrica galega, que teña en consideración o feito de que Galicia é produtora e exportadora de enerxía, co fin de rebaixar o prezo.

O concelleiro de Medio Ambiente, Javier García, destacou que “este este goberno aposta polo emprego e pola aplicación de enerxías renovables, así como polo traballo en colaboración con empresas sensibilizadas con proxectos que impulsan o asociacionismo e que defenden o noso medio ambiente. Deste xeito, hai que destacar a colaboración de Nosa Enerxía nas limpezas dos ríos, plantación de castiñeiros en diversos concellos galegos, a promoción do transporte sostible a través do vehículo eléctrico, etc.”

Contido relacionado

La Voz de Galicia: "Ames firma once contratos con Nosa Enerxía en su apuesta por las renovables"
Lindeiros: "Ames asina 11 novos contratos coa cooperativa galega Nosa Enerxía"