[21-07-2017] Tamara Pérez e Miguel Araújo estarán este venres, 21 de xullo, a partir das 21:30 horas, na terraza do Café Bar 500 no Milladoiro. O concerto encádrase dentro do programa Noites na Terraza, que conta coa colaboración do Concello de Ames a través da Concellería de Educación e Cultura. Este domingo, 23 de xullo, tamén se celebra a Virxe do Carme en Bugallido.
O dueto Soul & Roll é un proxecto musical composto por Tamara Pérez, voz, e Miguel Araújo, guitarra acústica. Fundado en Ourense en 2012, céntrase fundamentalmente na interpretación de cover´s de temas lendarios do pop, do rock e do soul nacional e internacional, desde a década dos 80 ata a actualidade. Alén diso, tamén teñen os seus propios temas. O primeiro deles é “Tatuados no Tempo”, co que renden homenaxe ao programa Luar da Televisión de Galicia. Coa súa segunda composición propia, Siempre Cantaré, o dueto ourensán presentouse ao Festival da Canción do Grove de 2013, acadando o segundo premio do certame.
Este venres, 21 de xullo, o dueto estará no ciclo Noites na Terraza, co que se pretende dinamizar o sector hostaleiro do Milladoiro e animar as noites de verán, para que a veciñanza goce do seu tempo de lecer ao tempo que escoita actuacións de grupos galegos. O programa conta coa colaboración do Concello de Ames a través da Concellería de Educación e Cultura.
Máis dúas semanas de Noites na Terraza no Milladoiro
Ademais do concerto do dueto Soul & Roll deste venres, nas vindeiras dúas semanas haberá un par de concertos máis encadrados no programa Noites na Terraza. O venres, 28 de xullo, Ángel América estará na cafetaría da Casa da Cultura e o venres seguinte, 4 de xullo, Aixa Romay actuará na terraza da cafetaría La Llama.
Domingo de festa en Bugallido
Este domingo, 23 de xullo, Bugallido conmemora a Virxe do Carme. Ás 12:00 horas haberá unha misa solemne e, posteriormente, a partir das 14:00 horas, a orquestra Compostela estará amenizando a sesión vermú. 