[13-06-2017] Desde este luns, 12 de xuño, e ata o próximo día 23, será posible inscribirse nas “Tardes de Xogo con Apego na Rúa”. O programa pretende xerar espazos de socialización en galego nos que nenas e nenos se acheguen ao mundo do xogo, imitando fórmulas empregadas antigamente e tentándoos afastar do abuso das novas tecnoloxías. Estas tardes de xogo desenvolveranse tanto en Bertamiráns coma no Milladoiro, do 27 de xuño ao 19 de xullo. En Bertamiráns, a actividade transcorrerá na praza da Maía, os martes das 18:30 ás 20:00 horas. No Milladoiro, o día escollido será o mércores, no mesmo horario de tarde, na praza da rúa da Costa Grande. Esta iniciativa está orientada para nenas e nenos entre os 3 e os 6 anos, que deberán asistir acompañados dunha ou dúas persoas adultas. Para participar é preciso anotarse previamente a través do correo normalizacion@concellodeames.gal.
A partir deste luns, 12 de xuño, e ata o próximo venres 23, todas as familias interesadas poderán inscribirse nas “Tardes de Xogo con Apego na Rúa”. Unha iniciativa que pretende achegar, aos e ás máis pequenas da casa (nenas e nenos entre os 3 e os 6 anos), a lingua galega e o mundo do xogo ao mesmo tempo. Para tramitar a inscrición é necesario enviar un correo ao enderezo normalizacion@concellodeames.gal.
A iniciativa decorrerá ao longo de catro tardes repartidas entre finais de xuño e as primeiras tres semanas de xullo. En Bertamiráns a actividade desenvolverase durante os martes 27 de xuño e 4, 11 e 18 de xullo, desde as 18:30 ata as 20:00 horas. No Milladoiro, será os mércores 28 de xuño e 5, 12 e 19 de xullo cando as nenas e nenos terán a oportunidade de participar desta actividade, tamén desde as 18:30 as 20:00 horas. Para participar é preciso que estean acompañados dunha ou dúas persoas adultas.
No Bertamiráns, o lugar escollido para desenvolver os xogos é a praza da Maía, mentres que no Milladoiro é a praza da rúa da Costa Grande. Nestes espazos, os e as máis pequenas da casa poderán participar da construción de xogos, así como da realización de xogos predeportivos como xogos grupais, musicais ou mesmo con paracaídas; tamén de xogos populares e tradicionais e de xogos lingüísticos que forman parte da nosa tradición oral e que serven para botar as sortes algo, facer equipos ou aprender cantigas para xogar á cordas.
Asemade, as e os participantes tamén terán a oportunidade de aprender nestas tardes xogos de diferentes partes do mundo, de gozar de xogos e enredos de enxeño e intelixencia e mesmo de participar dun laboratorio xogantín -un laboratorio de pensamento diverxente con obxectivos cotiás-.
O programa Apego é un proxecto colectivo que intenta fomentar e mellorar a transmisión do galego entre nenas e nenos nos seus primeiros anos de vida (entre os 0 e os 6 anos), a través de xogos, contacontos, festas, xornadas de convivencia e outras actividades..jpg)