[29-06-2016] Este venres, 1 de xullo, comeza unha nova edición do programa lúdico de bibliopiscinas que este ano presenta varias novidades. Esta iniciativa comeza cun recital do grupo Rosas sobre a figura de Maximino Castiñeiras, "O poeta da Maía", que se desenvolverá, ás 18:00 horas, na praia fluvial de Tapia. Este ano inclúese un amplo programa de actividades lúdicas e de animación á lectura denominado "Ler, xogar e nadar", que inclúe xogos tradicionais, obradoiros e actividades deportivas para todas as idades. Estas actividades desenvolveranse durante os meses de xullo e agosto nas piscinas descubertas do Milladoiro e Bertamiráns, e na área recreativa de Tapia.
O concelleiro de Educación e Cultura, David Santomil, destaca que "este ano reforzamos a programación das bibliopiscinas con máis contido, actividades lúdicas e de animación para todos os públicos". “Trátase dun proxecto moi necesario, xa que fomenta o hábito da lectura, e permite a conciliación”, finalizou dicindo Santomil.
As Bibliopiscinas é o programa lúdico e de animación á lectura, que se desenvolve nas piscinas municipais e na praia fluvial de Tapia durante os meses de xullo e agosto. Trátase dunha iniciativa da concellaría de Educación que, por décimo cuarto ano consecutivo, pretende achegar os seus servizos tradicionais, levando os libros, os xogos tradicionais, os contos, os xoguetes e varias actividades a estas áreas.
Este ano este programa presenta varias novidades. Unha delas é que o día de apertura do servizo, este venres 1 de xullo, o grupo Rosas ofrecerá un recital na praia fluvial de Tapia sobre a figura de Maximino Castiñeiras, "O poeta da Maía". Ademais, este ano inclúese un amplo programa de actividades lúdicas e de animación á lectura denominado "Ler, xogar e nadar", que inclúe xogos tradicionais, obradoiros e actividades deportivas para todas as idades.
O grupo Rosas, que está integrado por Julia María Dopico, na bandurria; Miguel Calabuig, na guitarra; e José Luis Mera, rapsoda; tamén presentará o seu disco “Rosas para Galicia. Este traballo discográfico é unha homenaxe a Maximino Castiñeiras "O poeta da Maía", ao redor do cal xira a liña temática deste ano por primeira vez, cunha selección de textos de Antoloxía Poética e Florilerio, entre outros.
Máis dun cento de libros nas bibliopiscinas
A empresa local Órbita Infantil, con ampla experiencia no desenvolvemento de servizos complementarios de educación en Ames, levará a cabo este programa ao presentar a mellor oferta económica e un amplo programa de actividades lúdicas para o verán. Asemade, as bibliotecas municipais porán máis dun cento de libros a disposición dos usuarios/as para a súa consulta e préstamo.
En Bertamiráns e no Milladoiro o horario será de luns a venres de 16:00 a 20:00 horas. As fins de semana e os festivos estarán pechadas. En Tapia o horario será o mesmo, dende as 16:00 h ás 20:00 horas, pero de martes a domingo (os luns estarán pechadas por descanso do persoal). Ademais, estará aberto os días festivos. Durante os meses de xullo e agosto o horario das bibliotecas municipais de Bertamiráns e do Milladoiro será de 9:00 a 14:00 horas.