O Concello de Ames, a través da Concellaría de Promoción Económica e Emprego, acollerá durante a primeira semana de novembro dous relatorios sobre como evitar fraudes no comercio electrónico. As persoas participantes recibirán instrucións sobre como comprar e vender en liña de xeito seguro e sorteando estafas. Ditos relatorios realizaranse o luns 2 de novembro no salón de plenos da Casa da Concello, en Bertamiráns, e o martes 3 de novembro no Centro Multifuncional do Milladoiro. Ambas actividades serán ás 19.30 horas. Estas actividades enmárcanse no acordo que teñen asinado o Concello de Ames e a Unión de Consumidores de Galicia (UCGAL).

A Xuntanza de Empresarios de Ames, coa colaboración do Concello de Ames, organiza a sexta edición do concurso de fotografía Enfoca Ames, quen ten como obxectivo fomentar o achegamento da cidadanía aos lugares máis emblemáticos de Ames. As persoas participantes deberán presentar unha fotografía que recolla o patrimonio natural, artístico e/ou cultural do noso concello. Admítese unha fotografía por cada unha das tres categorías existentes. A participación no concurso é gratuíta. O prazo de entrega das imaxes remata o 4 de novembro de 2026. As fotografías teñen que ser enviadas xunto coa ficha de inscrición por correo electrónico ao enderezo enfocames@gmail.com. Podes consultar as bases completas do Enfoca Ames 2026 na seguinte ligazón.

A aula CeMIT, situada na Casa da Cultura de Bertamiráns, amplía a súa oferta formativa e organiza novos cursos en materia de habilidades dixitais para adultos de cara aos meses de novembro e decembro. Ofértanse un total de 14 prazas para cada un dos novos cursos, e para poder participar é necesario estar dado de alta na rede do CEMIT. Para os máis cativos, as formacións continúan ata decembro con cursos de informática para nenos/as e mecanografía para rapaces e rapazas.

A Asociación de Empresarios do Parque Empresarial do Milladoiro e a Asociación de Dano Cerebral de Santiago de Compostela organizan para o sábado, 24 de outubro, a primeira edición da Marcha Prevención do Dano Cerebral, na que cada donativo será unha axuda real para que a Asociación de Dano Cerebral de Santiago de Compostela poida ampliar as súas instalacións. Nesta iniciativa solidaria colaboran os Concellos de Ames e Santiago de Compostela e a Deputación da Coruña. A andaina discorrerá entre O Milladoiro e Santiago de Compostela. A ruta transcorre maioritariamente por terreo chan ou con lixeira pendente descendente. Os organizadores recomendan levar calzado cómodo para terreos irregulares, xa que pode haber algúns tramos húmidos. As inscricións poden tramitarse ata o 23 de outubro. Premendo nesta ligazón podes acceder á páxina web onde realizar as inscricións.