A Asociación de Empresarios do Parque Empresarial do Milladoiro e a Asociación de Dano Cerebral de Santiago de Compostela organizan para o sábado, 24 de outubro, a primeira edición da Marcha Prevención do Dano Cerebral, na que cada donativo será unha axuda real para que a Asociación de Dano Cerebral de Santiago de Compostela poida ampliar as súas instalacións. Nesta iniciativa solidaria colaboran os Concellos de Ames e Santiago de Compostela e a Deputación da Coruña. A andaina discorrerá entre O Milladoiro e Santiago de Compostela. A ruta transcorre maioritariamente por terreo chan ou con lixeira pendente descendente. Os organizadores recomendan levar calzado cómodo para terreos irregulares, xa que pode haber algúns tramos húmidos. As inscricións poden tramitarse ata o 23 de outubro. Premendo nesta ligazón podes acceder á páxina web onde realizar as inscricións. 

A actividade proposta para este venres, 23 de outubro, polo club xuvenil Distrito 13 17, trátase dunha xornada adicada aos xogos de mesa, cunha selección ampla e variada, que fuxirá dos xogos máis tradicionais e vén disposta a descubrirlle aos participantes aquelas propostas máis orixinais e diferentes. A actividade terá lugar no Pazo da Peregrina en Bertamiráns, e terá unha duración de dúas horas, de 19.00 a 21.00 horas. Está dirixida a rapaces e rapazas de entre 13 e 17 anos. Podes anotarte premendo nesta ligazón. Para máis información, as persoas interesadas poden contactar en info@anacoseducativos.com ou no 694 216 484. Podes consultar toda a programación premendo nesta ligazón.

O concello de Ames acolleu hoxe unha nova edición da carreira pedestre popular que se desenvolveu na localidade de Bertamiráns e a súa contorna. Na proba absoluta 10K masculina o gañador foi Mehdi Elnabaoui, cun tempo de 31.29. Na segunda posición quedou o atleta local de Ames, Lucas Pena, cun tempo de 32.03, e terceiro foi Salama Loutfi El Ghazali, cun tempo de 32.55. Na categoría feminina a gañadora foi Sandra Mosquera, cun tempo de 37.34. A segunda posición foi para Patricie Viadel Turjanicová, cun tempo de 38.07, e na terceira posición quedou Soledad Leiro, cun tempo de 38.34. Esta proba pertence ao XII Circuíto provincial de carreiras populares da Deputación da Coruña. Premendo nesta ligazón podes consultar todas as clasificacións da carreira pedestre.

O Concello de Ames recibirá un total de 3.887.804,75 euros da Deputación da Coruña a través do Plan Único de Concellos (POS+) 2026, sumando o plan principal e as achegas adicionais aprobadas ao longo do ano. A última achega, correspondente ao POS+ Adicional 4/2026, ascende a 569.317,42 euros e eleva o financiamento provincial global para Ames ata case 3,9 millóns de euros.