O Concello de Ames, a través da Concellaría de Promoción da Saúde, organiza un programa grupal para a mellora da calidade do sono, un dos piares fundamentais para o noso benestar físico e emocional. O programa impartirase desde o 26 de outubro ata o 14 de decembro no Pazo da Peregrina, situado en Bertamiráns. Hai 20 prazas dispoñibles e podes realizar a inscrición a través da seguinte ligazón. O prazo de inscrición está aberto ata o vindeiro 21 de outubro. Terán prioridade as persoas empadroadas no Concello de Ames. No caso de haber máis inscricións que prazas ofertadas, adxudicaranse por sorteo.

Este domingo, 18 de outubro, celebrarase a vixésimo quinta edición da Carreira Pedestre Popular do Concello de Ames. Esta proba contará cun circuíto homologado pola Real Federación Española de Atletismo, con saída e chegada en Bertamiráns, na rúa Alcalde Lorenzo. O circuíto da proba absoluta estará debidamente sinalizado e contará con indicacións en cada quilómetro. Nesta edición hai inscritas 1.203 persoas (arredor de 521 nas categorías absoluta e sub-18, mentres que nas categorías escolares hai 682 rapaces e rapazas inscritos). Os dorsais poden retirarse na Casa do Concello o sábado, 17 de outubro, en horario das 17:00 ás 20:00 horas, ou o mesmo día da carreira ata media hora antes da proba correspondente. Premendo nesta ligazón pódese consultar o regulamento ao completo e os horarios da XXV Carreira Pedestre Popular do Concello de Ames.

O Concello de Ames, a través da Concellaría de Cultura, leva desde 2023 ofrecendo o programa de residencias artísticas para que os creadores, creadoras e compañías profesionais desenvolvan as súas liñas de traballo nos ámbitos das artes escénicas. A través desta iniciativa trátase de apoiar a creación artística do tecido profesional e empresarial. En 2023 realizouse a primeira solicitude e desde ese ano ata a actualidade atendéronse un total de 20 solicitudes. Durante este ano 2026, tres compañías xa fixeron uso deste programa: Ibuprofeno Teatro, Marta Alonso Tejada e Producións Teatrais Excéntricas. Ademais, Teatro do Noroeste ensaiará o seu novo espectáculo Vento Mareiro non dá voltas do 23 ao 28 de novembro.

O alcalde de Ames, Blas García, participou este mércores, 14 de outubro, no webinario «Alimentación y Agenda Urbana: del papel a la acción», organizado pola Rede de Municipios pola Agroecoloxía en colaboración co equipo URBACT. Na súa intervención compartiu a experiencia municipal na conexión entre a produción de proximidade, os comedores escolares e a planificación urbana. O rexedor municipal explicou como o PAI «Conecta Ames» reúne o futuro mercado municipal de Bertamiráns, a recuperación de terras para a produción ecolóxica e a formación de persoas produtoras, cun investimento previsto de arredor de 3,8 millóns de euros. Preme aquí para consultar a presentación sobre a estratexia alimentaria de Ames.