A Concellaría de Benestar Social, a través da Oficina de Voluntariado de Ames, vén de lanzar unha nova campaña, neste caso para recoller enseres para bebés. O obxectivo principal é tratar de recoller produtos infantís como berces, carriños de paseo, tronas, cueiros e cadeiras infantís. As persoas que desexen participar poden facer as súas doazóns nas Casas da Cultura de Bertamiráns e do Milladoiro, de luns a venres, en horario de 10.00 a 13.00 horas.

O Concello de Ames, a través da Concellaría de Benestar Social e Voluntariado, colabora con Cidalia no impulso do proxecto Museo Migrante Migrante en Movemento, unha iniciativa creada e dirixida pola artista visual Angélica Dass, que entende a migración coma unha condición inherente á experiencia humana. MMM recolle historias de movemento a través de obxectos, retratos e relatos. A migración enténdese como unha parte esencial da experiencia humana. Angélica Dass estará en Ames o luns 13 e o xoves 16 de abril impartindo obradoiros de memoria e fotografía nos IES de Ames, en  Bertamiráns, e no IES do Milladoiro.  O venres 17 de abril, ás 18.30 horas, impartirase na Casa da Cultura do Milladoiro a conferencia “A Historia Viva de Ames. Museo das inMigrantes”.

A Asociación de Xubilados e Pensionistas do Milladoiro (JUPEMI) vén de renovar a súa directiva, abrindo unha nova etapa centrada en reforzar a participación e ampliar a oferta de actividades dirixidas ás persoas maiores. A nova executiva mantivo xa unha primeira reunión institucional co alcalde de Ames, Blas García, e coa concelleira de Servizos Sociais, Uxía García, na Casa dos Maiores do Milladoiro.

A Oficina de Voluntariado de Ames, dependente da Concellaría de Benestar Social, organiza unha excursión a Portugal para os días 18 e 19 de abril. Para esta actividade aínda quedan prazas dispoñibles e ábrese a toda a veciñanza que queira participar. Durante dúas xornadas visitarase a cidade de Braga, Bom Xesús, Vilanova de Cerveira e A Fortaleza. O custo da actividade é de 140 euros e inclúe desprazamento, seguro de viaxe, guías turísticos, hotel, almorzos, xantares e cea. Para participar nesta excursión hai que inscribirse previamente chamando aos número de teléfono 981 89 09 64 / 981 53 59 41 das Unidades Municipais de Servizos Sociais de Bertamiráns e do Milladoiro.